കോഴിക്കോട്: ഓടിക്കൊണ്ടിരിക്കുന്ന ബസിന്റെ ചക്രത്തിനുള്ളില് അകപ്പെട്ടയാള് അത്ഭുതകരമായി രക്ഷപ്പെട്ടു. കോഴിക്കോട് താമരശേരി ഈങ്ങാപ്പുഴ ബസ് സ്റ്റാന്ഡിനു സമീപമായിരുന്നു സംഭവം.
ദേശീയ പാതയില്നിന്നു ബസ് സ്റ്റാന്ഡിലേക്കു പ്രവേശിക്കുന്ന ഭാഗത്തു പാര്ക്ക് ചെയ്തിരുന്ന ബൈക്കുകള്ക്കിടയിലേക്കു ബസ് നിയന്ത്രണംവിട്ട് ഓടിക്കയറി. ഇതിനിടെ ബൈക്കും അതിലിരുന്നയാളും ചക്രത്തിനുള്ളില് കുടുങ്ങുകയായിരുന്നു. ചക്രത്തിനുള്ളില് സ്കൂട്ടര് യാത്രികന് പെട്ടതു റോഡില് നിന്നവര് വിളിച്ചുപറഞ്ഞപ്പോഴാണു ബസ് ഡ്രൈവര് അറിഞ്ഞത്. ഉടന് തന്നെ ബസ് നിര്ത്തിയതുകൊണ്ടു വലിയ അപകടം ഒഴിവായി.
അത്ഭുതകരമായാണു ചക്രത്തിനുള്ളില് കുടുങ്ങിയയാള് രക്ഷപ്പെട്ടത്. നാലു പേര്ക്ക് അപകടത്തില് പരിക്കേറ്റു. കോടഞ്ചേരി റൂട്ടിലോടുന്ന ഹാപ്പിടോപ് ബസാണ് അപകടമുണ്ടാക്കിയത്.
അപകടത്തിന്റെ വീഡിയോ ദൃശ്യങ്ങള് പുറത്തുവന്നു. ബൈക്കും അതിലിരുന്നയാളും ചക്രത്തിനുള്ളില് കുടുങ്ങി ഏതാനും മീറ്റര് റോഡിലൂടെ നിരങ്ങുന്നതു ദൃശ്യങ്ങളില് കാണാം.
