അട്ടപ്പാടി മധു വധക്കേസില് കൂറുമാറിയ സാക്ഷി സുനില് കുമാറിനോട് ഇന്ന് കോടതിയില് ഹാജരാകാന് നിര്ദേശം. സുനില് കുമാറിന് കാഴ്ചാക്കുറവില്ലെന്നാണ് പരിശോധനാ ഫലം. വിശദമായ മെഡിക്കല് റിപ്പോര്ട്ട് പൊലീസ് ഇന്ന് കോടതിയില് ഹാജരാക്കും.
ഇന്നലെയാണ് മധു വധക്കേസിലെ 29ാം സാക്ഷി സുനില്കുമാര് കൂറു മാറിയത്. മധുവിനെ മര്ദ്ദിക്കുന്നത് ഉള്പ്പെടെ കണ്ടിരുന്നു എന്നായിരുന്നു നേരത്തെ സുനില്കുമാര് പൊലീസിന് മൊഴി നല്കിയിരുന്നത്. കോടതിയില് ഇന്നലെ ഇത് മാറ്റി പറഞ്ഞു. തുടര്ന്ന് മധുവിനെ മര്ദ്ദിക്കുന്നത് സുനില്കുമാര് നോക്കിനില്ക്കുന്ന ദൃശ്യങ്ങള് ഉള്പ്പെടെ കോടതിയില് പ്രദര്ശിപ്പിച്ചു. അതോടെ തനിക്ക് ഒന്നും കാണാന് കഴിയുന്നില്ല എന്ന് സുനില്കുമാര് പറഞ്ഞു.
സുനില് കുമാര് കൂടി കൂറുമാറിയതോടെ മധു വധ കേസില് കൂറുമാറിയവരുടെ എണ്ണം 15 ആയിരുന്നു. മധുവിനെ പ്രതികള് പിടിച്ചു കൊണ്ട് വരുന്നത് കണ്ടു, പ്രതികള് കള്ളന് എന്നു പറഞ്ഞ് മധുവിന്റെ ദൃശ്യങ്ങള് എടുക്കുന്നത് കണ്ടു എന്നുമായിരുന്നു സുനില് കുമാര് പൊലീസിന് നല്കിയ മൊഴി. ഈ മൊഴിയാണ് സുനില് കുമാര് കോടതിയില് മാറ്റി പറഞ്ഞത്.
അതേസമയം രണ്ട് സാക്ഷികള് ഇന്നലെ പ്രോസിക്യൂഷന് അനുകൂലമായി മൊഴി നല്കി. സാക്ഷികളായ വിജയകുമാര്, രാജേഷ് എന്നിവരാണ് മൊഴിയില് ഉറച്ചു നിന്നത്.
