അട്ടപ്പാടി മധു വധകേസില്‍ 29ാം സാക്ഷി സുനില്‍ കുമാറിനെതിരെ പ്രോസിക്യൂഷന്‍ നല്‍കിയ പരാതിയില്‍ ഇന്ന് കോടതി വിധി പറഞ്ഞേക്കും. സാക്ഷി കോടതിയെ കബളിപ്പിച്ചെന്ന് കാണിച്ചാണ് സ്പെഷ്യല്‍ പബ്ലിക്ക് പ്രോസിക്യൂട്ടര്‍ കോടതിയില്‍ ഹര്‍ജി നല്‍കിയത്.
മധുവിനെ മര്‍ദ്ദിക്കുന്നത് ഉള്‍പ്പെടെ കണ്ടിരുന്നു എന്നായിരുന്നു നേരത്തെ സുനില്‍കുമാര്‍ പൊലീസിന് മൊഴി നല്‍കിയിരുന്നത്. കോടതിയില്‍ ഇത് മാറ്റി പറഞ്ഞു. തുടര്‍ന്ന് മധുവിനെ മര്‍ദ്ദിക്കുന്നത് സുനില്‍കുമാര്‍ നോക്കിനില്‍ക്കുന്ന ദൃശ്യങ്ങള്‍ ഉള്‍പ്പെടെ കോടതിയില്‍ പ്രദര്‍ശിപ്പിച്ചു. അതോടെ തനിക്ക് ഒന്നും കാണാന്‍ കഴിയുന്നില്ല എന്ന് സുനില്‍കുമാര്‍ പറഞ്ഞു. പിന്നീട് കോടതി നിര്‍ദ്ദേശ പ്രകാരം ഇയാളുടെ കാഴ്ചശക്തി പരിശോധിച്ചു. പരിശോധനയില്‍ കാഴ്ചയ്ക്ക് തകരാറില്ലെന്ന് കണ്ടെത്തി.
തുടര്‍ന്ന് കള്ളസാക്ഷി പറഞ്ഞ് കോടതിയെ കബളിപ്പിക്കാന്‍ സുനില്‍ കുമാര്‍ ശ്രമിച്ചു എന്ന് കാട്ടി പ്രോസിക്യൂഷന്‍ കോടതിയില്‍ ഹര്‍ജി സമര്‍പ്പിക്കുകയായിരുന്നു.
അതേസമയം മൂന്ന് സാക്ഷികളുടെ വിസ്താരവും ഇന്ന് നടക്കും. 98, 99, 100 സാക്ഷികളുടെ വിസ്താരമാണ് നടക്കുക. ഇന്നലെ മധുവിന്റെ അമ്മ മല്ലി, സഹോദരി ചന്ദ്രിക, ഇവരുടെ ഭര്‍ത്താവ് എന്നിവരുടെ വിസ്താരം നടന്നിരുന്നു. വിചാരണക്കിടെ മധുവിന്റെ അമ്മ കോടതിയില്‍ പൊട്ടിക്കരഞ്ഞു. കേസിലെ സര്‍ക്കാര്‍ അഭിഭാഷകന് വേതനം നല്‍കാത്തതിലെ ആശങ്ക മല്ലി കോടതിയെ അറിയിച്ചിരുന്നു.
