തൃശൂര് പി.യു.സനൂപ് വധക്കേസില് സനൂപിനെ ക്രൂരമായി ആക്രമിച്ചെന്ന് സമ്മതിച്ച് പ്രതികള്. ഇരുമ്പു ദണ്ഡുകൊണ്ട് തലയ്ക്കടിച്ചുവെന്ന് നാലാം പ്രതി സുജയ് അന്വേഷണ ഉദ്യോഗസ്ഥരോട് സമ്മതിച്ചു. വെട്ടുകത്തി കൊണ്ട് വെട്ടിയതായാണ് അഞ്ചാം പ്രതി സുനീഷിന്റെ മൊഴി. ഇരുവരെയും ഇന്ന് തെളിവെടുപ്പിന് എത്തിക്കും.
ഇന്നലെ തൃശൂര് തണ്ടിലത്ത് വെച്ചാണ് ഇരുവരെയും പിടികൂടിയത്. സനൂപിനെ ആക്രമിച്ച സംഘത്തില് ഇവരും ഉണ്ടായിരുന്നു. സംഭവത്തില് നേരത്തെ പിടിയിലായ മുഖ്യപ്രതി നന്ദനെ കോടതി 14 ദിവസത്തേക്ക് റിമാന്റ് ചെയ്തു. ഇയാളെ കസ്റ്റഡിയില് വാങ്ങിയ ശേഷം തെളിവെടുപ്പിനായി ചിറ്റിലങ്ങാട് എത്തിക്കും. നന്ദനെ ചോദ്യം ചെയ്തതില് നിന്ന് മറ്റ് പ്രതികളെ കുറിച്ച് പൊലീസിന് സൂചന ലഭിച്ചിട്ടുണ്ട്.
പ്രതികള് തൃശൂര് ജില്ല വിട്ടിട്ടില്ലെന്നാണ് വിവരം. സനൂപിന്റെ കൊലപാതകവുമായി ബന്ധപ്പെട്ട് പ്രതികള് വസ്ത്രം ഉപേക്ഷിച്ച ചിറ്റിലങ്ങാട്ടെ കുളക്കരയില് ഫോറന്സിക് സംഘം പരിശോധന നടത്തി. ഇവിടുന്ന് ലഭിച്ച രക്ത സാമ്പിളുകള് ഡിഎന്എ പരിശോധനയ്ക്ക് അയക്കും.
