കോഴിക്കോട്: കൊടുവള്ളിയില്‍ ക്വട്ടേഷന്‍ സംഘം യുവാവിനെ ആളു മാറി തട്ടിക്കൊണ്ടു പോയി മര്‍ദിച്ചതായി പരാതി. പരിക്കേറ്റ കൊടുവള്ളി സ്വദേശി ജസ്ബിറിനെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. കുഴല്‍പ്പണ മാഫിയയുമായി ബന്ധമുള്ളവരാണ് തട്ടിക്കൊണ്ടു പോയതെന്ന് ജസ്ബിര്‍ പറഞ്ഞു.
കഴിഞ്ഞ ദിവസം രാത്രി ജസ്ബിറിനെയും സുഹൃത്തിനെയും കാറിലെത്തിയ അഞ്ചംഗ സംഘം കൊടുവള്ളിയില്‍ വെച്ച് തടഞ്ഞുനിര്‍ത്തി. തുടര്‍ന്ന് ജസ്ബിറിനെ മര്‍ദിച്ചതിച്ച ശേഷം മുഖം മൂടി ധരിപ്പിച്ച് കാറില്‍ കയറ്റി അജ്ഞാത കേന്ദ്രത്തിലേക്ക് കൊണ്ടു പോയി. ഇവിടെ വെച്ചും ക്രൂരമായി മര്‍ദിച്ചു. കുഴല്‍പ്പണ ഇടപാടുമായി ബന്ധപ്പെട്ട കാര്യങ്ങള്‍ വെളിപ്പെടുത്തണമെന്ന് ആവശ്യപ്പെട്ടായിരുന്നു മര്‍ദ്ദനം.
ജസ്ബിറിനെ തട്ടിക്കൊണ്ടു പോയ വിവരം കൊടുവള്ളി പൊലീസില്‍ അറിയിച്ചെങ്കിലും കൃത്യമായ ഇടപെടല്‍ ഉണ്ടായില്ലെന്ന് സുഹൃത്തുക്കള്‍ പറഞ്ഞു. എന്നാല്‍ സംഭവത്തെക്കുറിച്ച് അറിയില്ലെന്നാണ് പൊലീസിന്റെ വിശദീകരണം.
