കെഎസ്ആര്ടിസി ജീവനക്കാരുടെ ആത്മാഭിമാനത്തെ ചോദ്യം ചെയ്യരുതെന്ന് പ്രതിപക്ഷ നേതാവ് വിഡി സതീശന്. ശമ്പളം ഉള്പ്പടെയുള്ള ആനുകൂല്യങ്ങള്ക്കു വേണ്ടി ജീവനക്കാര്ക്കും കുടുംബാംഗങ്ങള്ക്കും വിവിധ ഡിപ്പോകളില് സമരം നടത്തേണ്ടി വരുന്നത് സങ്കടകരമാണ്. തൊഴിലാളി സമരങ്ങളില് ഊറ്റം കൊള്ളുന്നൊരു സര്ക്കാര് കെഎസ്ആര്ടിസി ജീവനക്കാരുടെ സമരം കണ്ടില്ലെന്ന് നടിക്കരുതെന്നും വി ഡി സതീശന് പറഞ്ഞു.
ആരോഗ്യം വിദ്യാഭ്യാസം തുടങ്ങിയവ പോലെ പൊതുഗതാഗത സംവിധാനവും സര്ക്കാരിന്റെ ഉത്തരവാദിത്വമാണ്. അവിടെ സര്ക്കാര് ലാഭ നഷ്ട കണക്കല്ല നോക്കേണ്ടത്. സാധാരണക്കാരുടെ പൊതുഗതാഗത സംവിധാനമാണ് കെഎസ്ആര്ടിസി. അതിനെ തകര്ക്കരുത്. ജോലി ചെയ്തതിന്റെ കൂലിയാണ് ജീവനക്കാര് ചോദിക്കുന്നത്. ശമ്പളം നല്കാന് സര്ക്കാര് അടിയന്തിരമായി ഇടപെടണമെന്നും അവരുടെ ഓണം കണ്ണീരിലാക്കരുതെന്നും സതീശന് കൂട്ടിച്ചേര്ത്തു.
അതേസമയം, കെഎസ്ആര്ടിസിയില് ശമ്പള വിതരണം തുടങ്ങി. ഹൈക്കോടതി നിര്ദേശ പ്രകാരം ജൂലൈ, ഓഗസ്റ്റ് മാസങ്ങളിലെ കുടിശ്ശികയായ ശമ്പളത്തിന്റെ മൂന്നിലൊന്നാണ് വിതരണം ചെയ്യുന്നത്. ശമ്പള വിതരണത്തിനായി 50 കോടി രൂപ കഴിഞ്ഞ ദിവസം സര്ക്കാര് കെഎസ്ആര്ടിസിക്ക് കൈമാറിയിരുന്നു. ശമ്പള വിതരണം ഇന്നും തിങ്കളാഴ്ചയുമായി പൂര്ത്തിയാക്കുമെന്ന് ഗതാഗത മന്ത്രി ആന്റണി രാജു പറഞ്ഞു.
