മൂവാറ്റുപുഴ: ഡീന്‍ കുര്യാക്കോസ് എം പി ഇടപെട്ടു നാഷണല്‍ ഓപ്പണ്‍ സ്‌കൂള്‍ വിദ്യാര്‍ത്ഥികളുടെ പരീക്ഷാഫലത്തിലെ അപാകത പരിഹരിച്ചു.കേന്ദ്ര വിദ്യാഭ്യാസവകുപ്പിനു കീഴില്‍ പ്രവര്‍ത്തിക്കുന്ന നാഷണല്‍ ഇന്‍സ്റ്റിറ്റ്യൂട്ട് ഓഫ് ഓപ്പണ്‍ സ്‌കൂളിങ്ങ് സുപ്രീം കോടതി നിര്‍ദേശപ്രകാരം 2020-ലെ സെക്കണ്ടറി,സീനിയര്‍ സെക്കണ്ടറി പരീക്ഷാഫലം ആഗസ്റ്റ് ആദ്യവാരം പ്രഖ്യാപിച്ചിരുന്നു. എന്നാല്‍ കേരളത്തിലെ വിവിധ ജില്ലകളില്‍ നിന്നുളള 174 വിദ്യാര്‍ത്ഥികള്‍ക്ക് ഭാഗികമായ റിസള്‍ട്ടാണ് കിട്ടിയത്.
മുന്‍പ് പഠിച്ച മറ്റു ബോര്‍ഡുകളുടെ ഫലത്തില്‍ നിന്നും വിജയിച്ച രണ്ടു വിഷയങ്ങളുടെ മാര്‍ക്ക് എന്‍ ഐ ഓ എസിലേക്ക് മാറ്റിനല്‍കുന്ന ക്രെഡിറ്റ് ട്രാന്‍സ്ഫര്‍ സമ്പ്രദായത്തില്‍ അപേക്ഷിച്ച ഈ കുട്ടികള്‍ എന്‍.ഐ.ഓ.എസില്‍ നിന്നും അപേക്ഷിച്ച മൂന്ന് വിഷയങ്ങള്‍ വിജയിച്ചിട്ടും മുന്‍ ബോര്‍ഡില്‍ നിന്നുളള ഒറിജിനല്‍ സര്‍ട്ടിഫിക്കറ്റ് സമര്‍പ്പിക്കാന്‍ വൈകിയെന്ന് കാണിച്ച് മാര്‍ക്ക് ഉള്‍പ്പെടുത്തി നല്‍കിയിരുന്നില്ല. അതിനാല്‍ ഉപരിപഠനത്തിന് കഴിയാത്ത അവസ്ഥയിലായിരുന്നു ഇവര്‍. ഈ ഘട്ടത്തില്‍ ഓപ്പണ്‍ സ്‌കൂള്‍ ടീച്ചേഴ്‌സ് അസോസിയേഷന്‍ ഭാരവാഹിയായ ബിനോദ് സൂര്യയുടെ അഭ്യര്‍ത്ഥന പ്രകാരം ഡീന്‍ കുര്യാക്കോസ് എം പി, കേന്ദ്ര വിദ്യാഭ്യാസമന്ത്രി രമേഷ് പ്രൊഖ്രിയാല്‍ നിഷാങ്കുമായി ബന്ധപ്പെടുകയും പ്രശ്‌നപരിഹാരം ആവശ്യപ്പെട്ട് കത്ത് നല്‍കുകയും ചെയ്തു.
ഇതിനെത്തുടര്‍ന്ന് രണ്ടര മാസം നീണ്ട അനിശ്ചിതത്വം അവസാനിപ്പിച്ച് ഒക്ടോബര്‍ 27 ന് 174 പേരുടെയും പൂര്‍ണ്ണമായ റിസള്‍ട്ട് നാഷണല്‍ ഇന്‍സ്റ്റിറ്റ്യൂട്ട് ഓഫ് ഓപ്പണ്‍ സ്‌കൂളിങ്ങിന്റെ ഔദ്യോഗിക വെബ്‌സൈറ്റില്‍ ലഭ്യമായി. ഇവര്‍ക്ക് മൂന്നാഴ്ചയ്ക്കുളളില്‍ സര്‍ട്ടിഫിക്കറ്റ് ലഭ്യമാക്കുമെന്ന് അധികൃതര്‍ അറിയിച്ചിട്ടുണ്ട്. ഈ സാഹചര്യത്തില്‍ ഒരു വര്‍ഷം നഷ്ടപ്പെടാതെ ഉപരിപഠനത്തിനു പോകാമെന്ന പ്രതീക്ഷയിലാണ് വിദ്യാര്‍ത്ഥികളും രക്ഷിതാക്കളും.
