പെരുമ്പാവൂര്‍ : പെരുമ്പാവൂര്‍ ഗവ. പോളിടെക്‌നിക്ക് കോളേജിന് നാഷണല്‍ ബോര്‍ഡ് ഓഫ് അക്രഡിറ്റേഷന്‍ ലഭ്യമായതായി എല്‍ദോസ് കുന്നപ്പിള്ളി എംഎല്‍എ അറിയിച്ചു. 3 വര്‍ഷത്തേക്കാണ് അംഗീകാരം ലഭ്യമായത്. ഇത് ലഭിക്കുന്ന കേരളത്തിലെ മൂന്നാമത്തെ കോളേജാണ് കൂവപ്പടിയില്‍ സ്ഥിതി ചെയ്യുന്ന ഗവ. പെരുമ്പാവൂര്‍ പോളിടെക്‌നിക്ക് കോളേജ്. 50 ശതമാനത്തിന് മുകളില്‍ ബ്രഞ്ചുകള്‍ക്ക് ദേശിയ അംഗീകാരം ലഭിക്കുന്ന കേരളത്തിലെ ആദ്യത്തെ കോളേജും പെരുമ്പാവൂരില്‍ ആണെന്നും എംഎല്‍എ പറഞ്ഞു.
തൃശൂര്‍ ഗവ. വനിത പോളിടെക്‌നിക്ക് കോളേജിലെ കമ്പ്യൂട്ടര്‍ ബ്രഞ്ചിനും പാലക്കാട് ഗവ. പോളിടെക്‌നിക്ക് കോളേജിലെ ഇലക്ട്രോണിക്‌സ്, മെക്കാനിക്കല്‍ ബ്രഞ്ചുകള്‍ക്കുമാണ് ഇതുവരെ അംഗീകാരം ലഭ്യമായിരുന്നത്. പെരുമ്പാവൂര്‍ പോളിടെക്‌നിക്ക് കോളേജിലെ കമ്പ്യൂട്ടര്‍, ഇലക്ട്രോണിക്‌സ് ആന്‍ഡ് കമ്യൂണിക്കേഷന്‍ ബ്രഞ്ചുകള്‍ക്കാണ് അംഗീകാരം ലഭിച്ചത്.
അംഗീകാരം ലഭിച്ചത് മൂലം പോളിടെക്‌നിക്ക് കോളേജില്‍ നിന്ന് പഠിച്ചിറങ്ങുന്ന വിദ്യാര്‍ഥികള്‍ക്ക് മറ്റു കടമ്പകള്‍ കടക്കാതെ തന്നെ വിദേശ രാജ്യങ്ങളില്‍ ഇനി മുതല്‍ ജോലി നേടുവാന്‍ സാധിക്കും. കേന്ദ്ര സര്‍ക്കാരില്‍ നിന്ന് ഗ്രാന്‍ഡുകള്‍ ലഭിക്കുന്നതിനും പുതിയ ബ്രാഞ്ചുകള്‍ കോളേജില്‍ ആരംഭിക്കുന്നതിന് സര്‍ക്കാരിന്റെ അനുമതി ലഭിക്കുന്നതിനും ദേശിയ അംഗീകാരം സഹായിക്കും.
21 കോടി രൂപയുടെ പദ്ധതികളാണ് ദേശിയ അംഗീകാരം നേടുന്നതിനായി പോളിടെക്‌നിക്ക് കോളേജില്‍ നടപ്പിലാക്കിയതെന്ന് എംഎല്‍എ പറഞ്ഞു. 6.10 കോടി രൂപ ചെലവില്‍ മെക്കാനിക്കല്‍ ബ്ലോക്കും 4.2 കോടി രൂപ അനുവദിച്ചു അഡ്മിനിസ്‌ട്രേറ്റീവ്, ലൈബ്രറി കെട്ടിടവും 5.2 കോടി രൂപ വിനിയോഗിച്ചു ആഡിറ്റോറിയവും അനുവദിച്ചു നിര്‍മ്മാണം പൂര്‍ത്തീകരിച്ചു കഴിഞ്ഞു. 5 കോടി രൂപ ചെലവില്‍ നിര്‍മ്മിക്കുന്ന ഇലക്ട്രോണിക്‌സ് ബ്ലോക്കിന്റെ പ്രവര്‍ത്തനങ്ങള്‍ ടെന്‍ഡര്‍ നടപടികളിലാണ്. കഴിഞ്ഞ വര്‍ഷം എംഎല്‍എ ഫണ്ടില്‍ നിന്നും 50 ലാപടോപ്പുകള്‍ കോളേജിലെ കമ്പ്യൂട്ടര്‍ ലാബിലേക്ക് അനുവദിച്ചിരുന്നു. ഈ വര്‍ഷം 50 ലാപടോപ്പുകള്‍ കൂടി അനുവദിക്കുമെന്ന് എംഎല്‍എ പറഞ്ഞു.
മെക്കാനിക്കല്‍, ഇലക്ട്രോണിക് ആന്‍ഡ് കമ്മ്യൂണിക്കേഷന്‍, കമ്പ്യൂട്ടര്‍ എഞ്ചിനീയറിംഗ് എന്നീ മൂന്ന് ബ്രഞ്ചുകളാണ് കോളേജില്‍ നിലവിലുള്ളത്. 1964 ല്‍ ജൂനിയര്‍ ടെക്‌നിക്കല്‍ സ്‌കൂളായി പ്രവര്‍ത്തനമാരംഭിച്ച സ്ഥാപനം 1994 ലാണ് പോളിടെക്‌നിക് കോളേജായി ഉയര്‍ത്തിയത്. നിലവില്‍ അറുന്നൂറോളം വിദ്യാര്‍ത്ഥികള്‍ പഠിക്കുന്ന ഇവിടെ ദേശിയ അംഗീകാരം ലഭ്യമായത് വിദ്യാഭ്യാസ നിലവാരം മികച്ചതാകുവാന്‍ സഹായകരമാകും.
പ്രിന്‍സിപ്പാള്‍ ഡോ. ഐജു തോമസ്, കമ്പ്യൂട്ടര്‍ വിഭാഗം മേധാവി ബിജു പീറ്റര്‍, ഇലക്ട്രോണിക്‌സ് വിഭാഗം മേധാവി ഡോ. പ്രീത പി, അക്രഡിറ്റേഷന്‍ കോളേജ് തല കോര്‍ഡിനേറ്റര്‍ പി.കെ ശിവന്‍ എന്നിവരുടെ നേതൃത്വത്തിലാണ് അക്രഡിറ്റേഷനുള്ള പ്രവര്‍ത്തനങ്ങള്‍ ഏകോപിപ്പിച്ചത്. കോളേജ് അലുംനി, പിടിഎ, വിവിധ വ്യവസായ വിഭാഗങ്ങള്‍ എന്നിവരുടെ പിന്തുണയും സഹായകരമായതായി കോളേജ് അധികൃതര്‍ പറഞ്ഞു.
