കോഴിക്കോട്: ഗോവയില്‍ കണ്ടെത്തിയ കോഴിക്കോട് മേപ്പയ്യൂര്‍ സ്വദേശി ദീപക് എട്ടുമാസം മുമ്പ് മരിച്ചെന്ന് കരുതി മൃതദേഹം സംസ്‌കരിക്കുക വരെ ചെയ്തിരുന്നു. പിന്നീടാണ് സംസ്‌കരിച്ച മൃതദേഹം ദീപക്കിന്റേതല്ലെന്ന് വ്യക്തമായത്. ദീപക്കിന്റേതെന്ന് കരുതി സംസ്‌കരിച്ച മൃതദേഹം സ്വര്‍ണ്ണക്കടത്ത് സംഘം തട്ടിക്കൊണ്ടു പോയ പന്തിരിക്കര സ്വദേശി ഇര്‍ഷാദിന്റേതാണെന്ന് കണ്ടെത്തിയിരുന്നു. അപ്പോഴും ദീപക്ക് എവിടെയെന്നത് സംബന്ധിച്ച് ആര്‍ക്കും ഒരു വിവരവും ഉണ്ടായിരുന്നില്ല. കഴിഞ്ഞ ദിവസം ഗോവയിലെ മലയാളി സമാജം പ്രവര്‍ത്തകരാണ് ദീപക്കിനെ ആദ്യം തിരിച്ചറിഞ്ഞത്. ഗോവയിലെ ഒരു ഹോട്ടലില്‍ ആരും അറിയാതെ ജോലി ചെയ്യുകയായിരുന്നു ദീപക് നിലവില്‍ ഗോവ പോലീസിന്റെ കസ്റ്റഡിയിലാണ്.
ദീപക്കിനെ 2022 ജൂണ്‍ ആറിനാണ് കാണാതാവുന്നത്. ഗള്‍ഫില്‍ ജോലി ചെയ്തിരുന്ന ദീപക്കിനെ നാട്ടില്‍ വെച്ചാണ് കാണാതായത്. തുടര്‍ന്ന് ദീപക്ക് മരിച്ചെന്ന് കരുതി മറ്റൊരു യുവാവിന്റെ മൃതദേഹം സംസ്‌കരിക്കുകയും ചെയ്തു. ജൂലൈ 17ന് കൊയിലാണ്ടി തീരത്ത് അടിഞ്ഞ ജീര്‍ണ്ണിച്ച മൃതദേഹത്തിന് ദീപക്കുമായി രൂപസാദൃശ്യം ഉണ്ടായതിനാലാണ് ബന്ധുക്കള്‍ മൃതദേഹം സംസ്‌കരിക്കാനിടയായത്. ഇതേ സമയത്താണ് സ്വര്‍ണ്ണക്കടത്ത് സംഘം തട്ടിക്കൊണ്ടു പോയ പന്തിരിക്കര സ്വദേശി ഇര്‍ഷാദിനായി പെരുവണ്ണാമൂഴി പോലീസ് അന്വേഷണം ആരംഭിക്കുന്നത്. പോലീസ് നടത്തിയ ഡിഎന്‍എ പരിശോധനലാണ് സംസ്‌കരിച്ച മൃതദേഹം ദീപക്കിന്റേതല്ലെന്ന് വ്യക്തമായത്. ഡിഎന്‍ എ പരിശോധനാ ഫലം വന്നതോടെ ദീപക്കിന്റേതെന്ന് കരുതി സംസ്‌കരിച്ച മൃതദേഹം ഇര്‍ഷാദിന്റേതാണെന്ന് വ്യക്തമാകുകയായിരുന്നു.
മൃതദേഹം ദീപക്കിന്റേതല്ലെന്ന് വ്യക്തമായതോടെ ദീപക്ക് എവിടെയെന്നത് സംബന്ധിച്ച് മേപ്പയ്യൂര്‍ പോലീസ് അന്വേഷണം തുടങ്ങിയെങ്കിലും കണ്ടെത്താനായിരുന്നില്ല. തുടര്‍ന്ന് കോഴിക്കോട് ക്രൈം ബ്രാഞ്ച് ഡിവൈഎസ്പിയായ ആര്‍ ഹരിദാസിന്റെ നേതൃത്വത്തിലുള്ള പോലീസ് സംഘം നല്‍കിയ വിവരത്തിന്റെ അടിസ്ഥാനത്തില്‍ ഗോവ പോലീസ് പനാജിയില്‍ വെച്ച് ദീപക്കിനെ കണ്ടെത്തുകയായിരുന്നു.
