സ്വര്ണക്കള്ളക്കടത്ത് കേസില് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കര് നല്കിയ മുന്കൂര് ജാമ്യ ഹര്ജിയില് ഹൈക്കോടതി ഇന്ന് വിധി പറയും. കസ്റ്റംസും, എന്ഫോഴ്മെന്റും രജിസ്റ്റര് ചെയ്ത കേസുകളില് ആണ് മുന്കൂര് ജാമ്യാപേക്ഷ നല്കിയിരിക്കുന്നത്. ശിവശങ്കറിന് ജാമ്യം അനുവദിക്കുന്നതിനെ കേന്ദ്ര ഏജന്സികള് ശക്തമായി എതിര്ത്തിട്ടുണ്ട്.
സ്വര്ണകടത്തിന്റെ ഗൂഢാലോചനയില് എം. ശിവശങ്കറിന് സജീവ പങ്കുണ്ടെന്നാണ് എന്ഫോഴ്സ്മെന്റിന്റെ വാദം. മുഖ്യമന്ത്രിയുടെ ഓഫീസിലെ ഉന്നത പദവി കള്ളക്കടത്തിനായി ദുരുപയോഗം ചെയ്തെന്നും എന്ഫോഴ്സ്മെന്റ് വാദിക്കുന്നു. മുന്കൂര് ജാമ്യ ഹര്ജി നിയമപരമായി നിലനില്ക്കില്ലെന്ന് കസ്റ്റംസും ഹൈക്കോടതിയെ അറയിച്ചിട്ടുണ്ട്. അറസ്റ്റ് ഒഴിവാക്കാനുള്ള ശിവശങ്കറിന്റെ നാടകമായിരുന്നു ആശുപത്രി വാസമെന്നാണ് കസ്റ്റംസ് കോടതിയെ അറിയിച്ചിരിക്കുന്നത്. അറസ്റ്റ് ഉണ്ടാകുമെന്ന് ഭയന്നാണ് ശിവശങ്കര് കോടതിയെ സമീപിച്ചതെന്നും കസ്റ്റംസ് നല്കിയ മറുപടിയില് വ്യക്തമാക്കിയിട്ടുണ്ട്. സ്വാധീന ശേഷിയുള്ള ശിവശങ്കറിന് മുന്കൂര് ജാമ്യം നല്കിയാല് തെളിവുകള് നശിപ്പിക്കാന് സാധ്യതയുണ്ടെന്നും കേന്ദ്ര ഏജന്സികള് വാദിക്കുന്നു.
അതേസമയം, താന് രാഷ്ട്രീയ കളിയുടെ ഇരയാണെന്നും അന്വേഷണത്തിന്റെ പേരില് തന്നെ മാനസികമായ പീഡിപ്പിക്കുകയാണെന്നുമാണ് ശിവശങ്കര് കോടതിയെ അറിയിച്ചത്. കള്ളപ്പണ, കള്ളക്കടത്ത് ഇടപാടില് പങ്കില്ലെന്നും തന്നെ ജയിലിലടക്കാന് ആണ് കേന്ദ്ര ഏജന്സികളുടെ ശ്രമമെന്നുമാണ് ശിവശങ്കര് കോടതിയെ അറിയിച്ചു. ശിവശങ്കറിന് എതിരായ തെളിവുകള് മുദ്ര വച്ച കവറില് ഇഡി കോടതിക്ക് കൈമാറിയിരുന്നു. ഇത് കൂടി പരിശോധിച്ച ശേഷമാണ് കോടതി ഇന്ന് വിധി പറയുന്നത്.
