മലപ്പുറത്ത് ക്രൂരമര്ദനത്തിനിരയായ പെണ്കുട്ടിള് പൊലീസിനെതിരെ ഗുരുതര ആരോപണവുമായി രംഗത്തെത്തിയതിന് പിന്നാലെ മൊഴി വീണ്ടും രേഖപ്പെടുത്തുമെന്ന് തേഞ്ഞിപ്പാലം സി.ഐ. കേസെടുത്തത് പെണ്കുട്ടികള് അന്ന് നല്കിയ മൊഴിയുടെ അടിസ്ഥാനത്തിലാണ്. യുവതികള് ഇപ്പോള് ഉന്നയിക്കുന്ന ആരോപണങ്ങള് അന്ന് പറഞ്ഞിരുന്നില്ല. വീഴ്ച്ച സംഭവിച്ചോയെന്ന് പരിശോധിക്കുമെന്നും വീണ്ടും അന്വേഷണം നടത്തുമെന്നും സി.ഐ വ്യക്തമാക്കി.
ദുര്ബല വകുപ്പ് ചുമത്തിയാണ് പൊലീസ് കേസെടുത്തതെന്നാണ് പരാതിക്കാരുടെ ആക്ഷേപം. കഴിഞ്ഞ ദിവസമാണ് പൊലീസ് ഇവരുടെ മൊഴിയെടുത്തത്. തിരൂരങ്ങാടിയിലെ പ്രമുഖനായ ലീഗ് നേതാവിന്റെ മകനാണ് സി എച്ച് ഇബ്രാഹിം ഷെബീര്. സംഭവത്തില് പ്രതികരിക്കാതെ പരാതി നല്കുകയായിരുന്നു വേണ്ടതെന്ന് തേഞ്ഞിപ്പാലം പൊലീസ് ഉപദേശിച്ചെന്നും പെണ്കുട്ടികള് പറയുന്നു. പറഞ്ഞ് തീര്ക്കാമെന്ന തരത്തിലായിരുന്നു പൊലീസിന്റെ ഇടപെടലെന്നാണ് പരാതി.
മലപ്പുറം പാണമ്പ്രയില് അപകടകരമായി വാഹനം ഓടിച്ചത് ചോദ്യം ചെയ്തതിനാണ് സഹോദരികളെ യുവാവ് ക്രൂരമായി മര്ദിച്ചത്. ദേശീയ പാതയില്വെച്ച് ജനക്കൂട്ടത്തിനിടയില് യുവാവ് അഞ്ച് തവണയാണ് പെണ്കുട്ടിയുടെ മുഖത്തടിച്ചത്. ഇതിന്റെ ദൃശ്യങ്ങള് പൊലീസിന് ലഭിച്ചു. തിരൂരങ്ങാടി സ്വദേശി സി എച്ച് ഇബ്രാഹിം ഷെബീറിനെതിരെ തേഞ്ഞിപ്പാലം പൊലീസ് കേസെടുത്തു. ഈ മാസം 16നാണ് കേസിന് ആസ്പദമായ സംഭവം നടന്നത്.
പെണ്കുട്ടികള് കോഴിക്കോട് നിന്ന് പരപ്പനങ്ങാടിയിലേക്ക് പോകുമ്പോഴാണ് സംഭവമുണ്ടായത്. അമിത വേഗതയിലെത്തിയ കാര് ഇടത് വശത്തുകൂടെ ഓവര്ടേക്ക് ചെയ്തതാണ് പെണ്കുട്ടികള് ചോദ്യം ചെയ്തത്. തുടര്ന്ന് ഇയാള് പെണ്കുട്ടികളെ തടഞ്ഞ് നിര്ത്തി മര്ദിക്കുകയായിരുന്നു. ദൃശ്യങ്ങള് തൊട്ടടുത്ത് നിന്നയാളാണ് പകര്ത്തിയത്. മര്ദനമേറ്റതില് ഒരു പെണ്കുട്ടി കഴുത്തിന് അസുഖം ബാധിച്ചയാളാണ്.
