കോഴിക്കോട്: ലിഫ്റ്റ് നല്കി ഭിന്നശേഷിക്കാരിയായ യുവതിയെ ബലാത്സംഗം ചെയ്തു കടന്നുകളഞ്ഞ പ്രതിയെ മണിക്കൂറുകള്ക്കുള്ളില് പൊലീസ് പിടികൂടി. പയ്യോളി അയനിക്കാട് സ്വദേശി ആഷിക് സോളമനാണ് പിടിയുലായത്. സിറ്റി പൊലീസ് കമ്മീഷണര് എവി ജോര്ജ്ജിന്റെ നേതൃത്വത്തില് മെഡിക്കല് കോളേജ് സിഐ മൂസ വള്ളിക്കാടനും നോര്ത്ത് അസിസ്റ്റന്റ് കമ്മീഷണര് കെ അഷ്റഫിന്റെ നേതൃത്വത്തിലുള്ള സ്പെഷ്യല് സ്ക്വാഡും ചേര്ന്നാണ് പ്രതിയെ പിടികൂടിയത്.
സംഭവം ഇങ്ങനെ
ഓണ്ലൈന് ഫുഡ് സപ്ലൈ ഡെലിവറി ജോലിചെയ്തു വരികയായിരുന്നു ആഷിഖ്. കഴിഞ്ഞ വെള്ളിയാഴ്ച രാത്രി എട്ടേമുക്കാലോടെ മെഡിക്കല് കോളജ് സ്റ്റോപ്പില് ബസ് കാത്തുനിന്ന യുവതിയെ വീട്ടിലാക്കിത്തരാം എന്നുപറഞ്ഞ് ഇയാള് സ്കൂട്ടറില് കയറ്റി. തുടര്ന്ന് തൊണ്ടയാട്, മലാപറമ്പ്, ചേവായൂര് ഭാഗങ്ങളില് കറങ്ങി മെഡിക്കല് കോളജ് ഭാഗത്ത് വീണ്ടും എത്തി. പിന്നീട് തൊണ്ടയാട് ആളൊഴിഞ്ഞ കെട്ടിടത്തിന് താഴെയെത്തിച്ച് മാനഭംഗപ്പെടുത്തി എന്നാണ് പോലീസ് പറയുന്നത്. അതിനുശേഷം യുവതി റോഡരികില് നില്ക്കുന്നത് ശ്രദ്ധയില്പ്പെട്ട ജനങ്ങള് പൊലീസില് വിവരമറിയിക്കുകയായിരുന്നു.
യുവതിയുടെ മൊഴി രേഖപ്പെടുത്തിയ ശേഷം പൊലീസ് കേസ് രജിസ്റ്റര് ചെയ്തു. തുടര്ന്ന് നടത്തിയ അന്വേഷണത്തില് പൊലീസ് ഇവര് സഞ്ചരിച്ച വഴിയിലെ 50 ഓളം സിസിടിവി ദൃശ്യങ്ങള് പരിശോധിച്ചു. അതില്നിന്ന് പ്രതിയെക്കുറിച്ച് വിവരങ്ങള് ലഭിച്ചു. നിരവധി കേസുകളില് ജയിലില് കിടന്നശേഷം ജാമ്യത്തിലിറങ്ങിയ ആളാണ് പ്രതിയെന്ന് പൊലീസ് പറഞ്ഞു.
