സംസ്ഥാനത്തെ തെരുവ് നായകളുടെ ആക്രമണത്തില് നിന്ന് പൗരന്മാരെ സംരക്ഷിക്കാനുള്ള ബാധ്യത സര്ക്കാറിനുണ്ടെന്ന് ഹൈക്കോടതി. പൊതുനിരത്തിലെ അക്രമകാരികളായ നായ്ക്കളെ കണ്ടെത്തി മാറ്റിപ്പാര്പ്പിക്കണം. ഇക്കാര്യത്തില് സര്ക്കാര് സ്വീകരിച്ച നടപടികള് മറ്റന്നാള് അറിയിക്കണമെന്നും ഹൈക്കോടതി വ്യക്തമാക്കി.
തെരുവ് നായ്ക്കളെ അടിച്ചുകൊന്ന് ജനം നിയമം കൈയിലെടുക്കരുതെന്നും കോടതി പറഞ്ഞു. ഇക്കാര്യം വ്യക്തമാക്കി സര്ക്കാര് നിര്ദ്ദേശങ്ങള് പുറപ്പെടുവിക്കണം. പൊതു അവബോധത്തിനായി പൊലീസ് മേധാവി സര്ക്കുലര് പുറപ്പെടുവിക്കണമെന്നും ഹൈക്കോടതി വ്യക്തമാക്കി. സംസ്ഥാനത്തെ തെരുവുനായ ആക്രമങ്ങളുടെ പശ്ചാത്തലത്തില് പ്രത്യേക സിറ്റിങ് നടത്തിയാണ് ഹൈക്കോടതി ഉത്തരവ്.
സംസ്ഥാനത്ത് തെരുവുനായ ആക്രമണം രൂക്ഷമാണ്. ഇടുക്കിയില് രണ്ട് പേര്ക്ക് ഇന്ന് കടിയേറ്റു. ഇടുക്കിയിലും എറണാകുളത്തുമായി വളര്ത്ത് ആടുകളേയും കോഴികളേയും നായകള് കടിച്ചു കൊന്നു.
എറണാകുളം കോതമംഗലം വാരപ്പെട്ടിയില് മൂന്ന് ആടുകളെ നായകള് കടിച്ചു കൊന്നു. ഒരാടിനെ കടിച്ച് ഗുരുതരമായി പരിക്കേല്പ്പിച്ചു. കക്കാട്ടൂരിലെ പ്ലാക്കോട്ട് ശിവശങ്കരന് നായരുടെ ആടുകളെയാണ് തെരുവുനായ്ക്കള് ആക്രമിച്ചത്.
