തിരുവനന്തപുരം നഗരസഭയിലെ വിവാദ കത്തിന് പിന്നില്‍ ആരാണെന്നുള്ളത് ക്രൈംബ്രാഞ്ച് അന്വേഷിച്ച് കണ്ടെത്തുമെന്ന് സി.പി.എം ജില്ലാ സെക്രട്ടറി ആനാവൂര്‍ നാഗപ്പന്‍. നഗരസഭയില്‍ അഴിമതി രഹിത ഭരണമാണ് നടക്കുന്നതെന്നും അദ്ദേഹം പറഞ്ഞു. മേയര്‍ സത്യപ്രതിജ്ഞ ചെയ്തത് മുതല്‍ താഴെയിറക്കാനുള്ള ശ്രമത്തിലാണ് യുഡിഎഫും ബിജെപിയും. ബി.ജെ.പി ജയിച്ചാലും വേണ്ടിയില്ല, സി.പി.എം തോല്‍ക്കണമെന്ന് ആഗ്രഹിക്കുന്നവരാണ് കോണ്‍ഗ്രസ്.
വിവാദങ്ങള്‍ ഉണ്ടായപ്പോള്‍ തന്നെ മേയര്‍ ആര്യാ രാജേന്ദ്രന് പറയുന്നുണ്ട് അത് താന്‍ എഴുതിയ കത്തല്ല എന്ന്. എല്ലാ അഴിമതികളും മേയര്‍ കണ്ടുപിടിച്ച് നടപടി സ്വീകരിക്കുമ്പോഴാണ് മറ്റുള്ളവര്‍ അറിയുന്നതെന്നും അദ്ദേഹം പറഞ്ഞു.
അതേസമയം, കത്ത് വ്യാജമെന്ന ക്രൈംബ്രാഞ്ച് കണ്ടെത്തല്‍ തള്ളി കോണ്‍ഗ്രസ്. നിയമപരമായും രാഷ്ട്രീയമായും നേരിടുമെന്ന് കോണ്‍ഗ്രസ് വ്യക്തമാക്കി. മേയര്‍ രാജിവെക്കും വരെ പ്രതിഷേധം നടത്താനാണ് കോണ്‍ഗ്രസിന്റെ തീരുമാനം.
ക്രൈംബ്രാഞ്ച് കണ്ടെത്തല്‍ ബി.ജെ.പിയും തള്ളി. ഇങ്ങനെയൊക്കെ വരുമൊള്ളൂ ആദ്യമേ അറിയാമായിരുന്നെന്ന് ബി.ജെ.പി കൗണ്‍സിലര്‍ കരമന അജിത്ത് പറഞ്ഞു. ചങ്കൂറ്റമുണ്ടെങ്കില്‍ സര്‍ക്കാര്‍ സി.ബി.ഐ അന്വേഷണം നടത്തണമെന്നും അദ്ദേഹം ആവശ്യപ്പെട്ടു. നാണം കെട്ട് ഇറങ്ങുന്നതിന് മുന്പ് മേയര്‍ രാജിവെച്ച് പുറത്തുപോകണമെന്നും ബി.ജെ.പി നേതാക്കള്‍ ആവശ്യപ്പെട്ടു.
തിരുവനന്തപുരം കോര്‍പറേഷനില്‍ നിയമനവുമായി ബന്ധപ്പെട്ട് മേയര്‍ ആര്യാരേജന്ദ്രന്റെ പേരിലുണ്ടായ കത്ത് വ്യാജമായി തയ്യാറാക്കിയതെന്ന നിഗമനത്തിലാണ് അന്വേഷണ സംഘം. എഫ്. ഐ.ആര്‍ ഉടന്‍ രജിസ്റ്റര്‍ ചെയ്യുമെന്നാണ് സൂചന.
