സ്വര്ണക്കടത്ത് കേസില് ബിനീഷ് കോടിയേരിക്ക് ക്ലീന് ചിറ്റ് നല്കാതെ എന്ഫോഴ്സ്മെന്റ് ഡയറക്ടറേറ്റ്. ബിനീഷിന്റെ മറുപടികള് പരിശോധിക്കാതെ ക്ലീന് ചിറ്റ് നല്കാന് കഴിയില്ലെന്നാണ് ഡയറക്ടറേറ്റ് പറയുന്നത്.
ബിനീഷുമായി ബന്ധമുള്ള കൂടുതല് പേരെ ചോദ്യം ചെയ്യാന് തീരുമാനിച്ചിട്ടുണ്ട്. നിലവില് ശേഖരിച്ചത് പ്രാഥമിക വിവരങ്ങള് മാത്രമാണെന്നും വീണ്ടും ചോദ്യം ചെയ്യുമെന്നും എന്ഫോഴ്സ്മെന്റ് വ്യക്തമാക്കി. ലഹരിമരുന്ന് കേസിലെ പ്രതികള് സ്വര്ണക്കടത്തിന് സഹായിച്ചോ എന്ന വിവരങ്ങള്ക്ക് പുറമേ ബിനീഷിന്റെ സാമ്പത്തിക ഇടപാടുകളെക്കുറിച്ചും എന്ഫോഴ്സ്മെന്റ് വിവരങ്ങളാരാഞ്ഞു. ബിനീഷ് കൈമാറിയ രേഖകളും പരിശോധനയ്ക്കയക്കും.
ഇന്നലെ ബിനീഷിനെ ചോദ്യം ചെയ്യലിനായി വിളിപ്പിച്ചിരുന്നു. രാവിലെ ഹാജരായ ബിനീഷിനെ പതിനൊന്ന് മണിക്കൂര് നീണ്ട ചോദ്യം ചെയ്യലിനൊടുവിലാണ് അന്വേഷണ സംഘം വിട്ടയച്ചത്. രാവിലെ 11 മണിക്കായിരുന്നു ബിനീഷ് കോടിയേരിയെ ചോദ്യം ചെയ്യല് ആരംഭിച്ചത്. രാത്രി 10 മണിയോടെയാണ് ചോദ്യം ചെയ്യല് പൂര്ത്തിയായത്. സ്വര്ണക്കടത്ത് കേസിലെ മുഖ്യ പ്രതിയായ സ്വപ്നാ സുരേഷിന് യുഎഇ കോണ്സുലേറ്റിലെ വീസ സ്റ്റാമ്പിംഗ് സെന്ററുകളില് നിന്ന് കമ്മീഷന് ലഭിച്ചതായി എന്ഫോഴ്സ്മെന്റ് ഡയറക്ടറേറ്റ് കണ്ടെത്തിയിരുന്നു. കമ്മീഷന് നല്കിയ കമ്പനികളില് ഒന്നില് ബിനീഷിന് മുതല് മുടക്ക് ഉണ്ടെന്നാണ് എന്ഫോഴ്സ്മെന്റ് ഡയറക്ടറേറ്റിന്റെ കണ്ടെത്തല്. ഇക്കാര്യം അന്വേഷിക്കുന്നതിനായാണ് ബിനീഷ് കോടിയേരിയെ ചോദ്യം ചെയ്തത്.
