ബാബരി മസ്ജിദ്- രാമജന്മഭൂമി കേസിലെ വിധിയുമായി ബന്ധപ്പെട്ട പരാമര്ശത്തില് നടി സ്വര ഭാസ്കറിനെതിരെ കോടതിയലക്ഷ്യ ഹര്ജി നല്കാന് അനുമതി നിഷേധിച്ചു. അറ്റോര്ണി ജനറല് കെ.കെ വേണുഗോപാലാണ് അനുമതി നിഷേധിച്ചത്.
മുംബൈയിലെ ഒരു പരിപാടിയില് സ്വര ഭാസ്കര് ബാബരി വിധിയെ കുറിച്ച് നടത്തിയ പരാമര്ശത്തിന് എതിരെയായിരുന്നു പരാതി- ‘ബാബരി മസ്ജിദ് തകര്ത്തത് നിയമവിരുദ്ധമാണെന്നാണ് സുപ്രീംകോടതി പറഞ്ഞത്. അതേ വിധിയില് മസ്ജിദ് തകര്ത്തവര്ക്ക് പാരിതോഷികം നല്കുന്നു. അങ്ങനെയൊരു രാജ്യത്താണ് നമ്മള് ജീവിക്കുന്നത്’.
സുപ്രീംകോടതിയില് കോടതിയലക്ഷ്യ ഹര്ജി നല്കാന് അറ്റോര്ണി ജനറലിന്റെ അനുമതി ആവശ്യമാണ്. കോടതി വിധിയെ കുറിച്ച് അഭിപ്രായം പറയുന്നത് അപകീര്ത്തികരമോ അവഹേളനമോ അല്ലെന്ന് അറ്റോര്ണി ജനറല് വ്യക്തമാക്കി. സ്വരയുടെ പ്രസ്താവനയുടെ ആദ്യ ഭാഗം വസ്തുതയാണെന്ന് അറ്റോര്ണി ജനറല് നിരീക്ഷിച്ചു. രണ്ടാം ഭാഗം സ്വന്തം കാഴ്ചപ്പാട് മാത്രമാണെന്നും അത് കോടതിയെ അവഹേളിക്കല് അല്ലെന്നും വേണുഗോപാല് പറഞ്ഞു.