മലയാള സിനിമയുടെ സ്വകാര്യ അഹങ്കരമായ മോഹന്ലാലിന് അറുപത്തിയൊന്നാം പിറന്നാള്. ഇതിഹാസ താരത്തിന്റെ ജന്മദിനം ആഘോഷമാക്കുകയാണ് സിനിമാ ലോകവും ലോകമെമ്പാടുമുള്ള ആരാധകരും. ഇതിനുള്ള തയാറെടുപ്പുകള് ആരാധകരും സിനിമാ ലോകവും ആരംഭിച്ചിട്ട് ഏറെ ദിവസങ്ങളായി. ഇക്കുറി എല്ലാം സൈബര് ലോകത്തെ ഒരുക്കങ്ങളാണ്. കോവിഡ് കാലത്ത് ഫാന്സിന്റെ ആഘോഷങ്ങളെല്ലാം വീടുകളില് ചുരുങ്ങിയിരിക്കുന്നു. എന്നാല് ലാലേട്ടനും അതിന് ഒരുത്തമ മാതൃക കാട്ടിയിട്ടുണ്ട്. ആര്ഭാടങ്ങളില്ലാതെയുള്ള പിറന്നാളാണ് അദ്ദേഹത്തിനിന്ന്. നാലു പതിറ്റാണ്ടിലേറെയായി മലയാളികളുടെ സിനിമാ സ്വപ്നങ്ങള്ക്ക് ഭാവവും ഭാവുകത്വവും നല്കിയ നടന വിസ്മയമാണ് മോഹന്ലാല്.
മലയാളികള് ഒന്നടങ്കം തങ്ങളുടെ പ്രിയപ്പെട്ട ലാലേട്ടന് ജന്മദിനാശംസകള് നേരുകയാണ്. മമ്മൂട്ടി മുതല് യുവതലമുറയിലെ താരങ്ങള് വരെ ലാലിന് ജന്മദിനാശംസകള് നേര്ന്നു. തിരനോട്ടത്തിലൂടെ മലയാള സിനിമയില് അരങ്ങേറ്റം കുറിച്ച്, ഇന്ത്യയിലെ തന്നെ മികച്ച നടന്മാരില് ഒരാളാകാന് മലയാളികളുടെ പ്രിയ ലാലേട്ടന് സാധിച്ചു. ലാലിന്റെ കള്ള ചിരിയും നോട്ടവും ചരിഞ്ഞ നടത്തവും ഡയലോഗുകളുമെല്ലാം സിനിമാ പ്രേമികളെ കീഴടക്കിക്കൊണ്ടേയിരിക്കുന്നു.
മലയാളത്തിന്റെ അതിര്വരമ്പുകള്ക്കപ്പുറം വളര്ന്ന് ഇന്ത്യന് സിനിമയ്ക്ക് തന്നെ സുപരിചിതനായി മാറുകയായിരുന്നു മോഹന്ലാല്. രണ്ടു തവണ മികച്ച നടനുള്ളതടക്കം നാല് ദേശീയ ചലച്ചിത്ര പുരസ്കാരങ്ങള് നേടിയ മോഹന്ലാല് മലയാളത്തിനു പുറമേ തമിഴ്, ഹിന്ദി, തെലുഗു, കന്നഡ തുടങ്ങിയ ഭാഷാചിത്രങ്ങളിലും തന്റെ പ്രതിഭ രേഖപ്പെടുത്തി.
1960 മേയ് 21 ന് പത്തനംത്തിട്ട ജില്ലയിലെ ഇലന്തൂരില് വിശ്വനാഥന് നായരുടേയും ശാന്താകുമാരിയുടേയും രണ്ടാമത്തെ മകനായി മോഹന്ലാല് ജനിച്ചു. മോഹന്ലാലിന്റെ അച്ഛന് വിശ്വനാഥന് നായര് കേരള സെക്രട്ടേറിയേറ്റിലെ നിയമ വകുപ്പിലെ ഉദ്യോഗസ്ഥനായിരുന്നു. തിരുവനന്തപുരത്ത് മുടവന്മുഗളിലെ തറവാട്ടു വീട്ടിലായിരുന്നു മോഹന്ലാലിന്റെ കുട്ടിക്കാലം. മോഹന്ലാലിന്റെ ഏകസഹോദരന് പ്യാരേലാലും അച്ഛന് വിശ്വനാഥന് നായരും ഇന്ന് ജീവിച്ചിരിപ്പില്ല. ‘കിളിക്കൊഞ്ചല്’ എന്ന ചിത്രത്തില് അഭിനയിച്ചിട്ടുള്ള പ്യാരേലാല് 2000 ല് മരണമടഞ്ഞു. അച്ഛന് വിശ്വനാഥന് നായര് 2007ലും മരണമടഞ്ഞു. അച്ഛന് വിശ്വനാഥന് നായരുടെയും അമ്മ ശാന്തകുമാരിയുടെയും പേരില് വിശ്വശാന്തി ഫൗണ്ടേഷന് ആരംഭിച്ചു.
ജീവിതം മാറ്റിമറിച്ച മോഡല് സ്കൂള് ജീവിതം:
തിരുവനന്തപുരത്തെ മോഡല് സ്കൂളിലാണ് മോഹന്ലാല് സ്കൂള് വിദ്യാഭ്യാസം പൂര്ത്തിയാക്കിയത്. മോഹന്ലാല് എന്ന നടനെ വാര്ത്തെടുക്കുന്നതില് ആ സ്കൂള് ജീവിതവും അവിടുത്തെ കൂട്ടുകാരും വലിയ പങ്കുവഹിച്ചിട്ടുണ്ട്. സംവിധായകന് പ്രിയദര്ശന്, ഗായകനായ എം.ജി. ശ്രീകുമാര് തുടങ്ങിയവരൊക്കെ സ്കൂളില് മോഹന്ലാലിന്റെ സഹപാഠികളായിരുന്നു. പിന്നീട് തിരുവനന്തപുരം മോഡല് സ്കൂളിലാണ് താരം തന്റെ സ്കൂള് വിദ്യാഭ്യാസം പൂര്ത്തിയാക്കിയത്. സ്കൂള് കാലഘട്ടത്തില് തന്നെ അഭിനയത്തോട് അഭിരുചി പ്രകടിപ്പിച്ച മോഹന്ലാല് സ്കൂള് നാടകങ്ങളിലെയും മറ്റും സജീവ സാന്നിധ്യമായിരുന്നു. സ്കൂള് കലാമേളയില് മികച്ച നടനായി തിരഞ്ഞെടുക്കപ്പെടുമ്പോള് മോഹന്ലാല് ആറാം ക്ലാസ്സില് പഠിക്കുകയാണ്. ‘കമ്പ്യൂട്ടര് ബോയ്’ എന്നു പേരിട്ട നാടകത്തില് കുഞ്ഞുലാലിന് ലഭിച്ചത് തൊണ്ണുറൂകാരന്റെ വേഷമായിരുന്നു. കുഞ്ഞ് മോഹന്ലാല് അത് ഗംഭീരമായി കൈകാര്യം ചെയ്തു.
സ്കൂള് കാലഘട്ടത്തിനു ശേഷം തിരുവനന്തപുരം എം ജി കോളേജില് ചേര്ന്ന മോഹന്ലാലിന്റെ അക്കാലത്തെ കൂട്ടുകാരായിരുന്നു പ്രിയദര്ശന്, മണിയന്പിള്ള രാജു എന്നിവര്. ജീവിതത്തില് എന്നും ചേര്ത്തു പിടിക്കുന്ന ആ സൗഹൃദങ്ങള് മലയാള സിനിമയുടെ അമരക്കാരനാവാനുള്ള മോഹന്ലാലിന്റെ യാത്രയില് ചെലുത്തിയ സ്വാധീനം വളരെ വലുതാണ്.
സിനിമാ ജീവിതം:
സുഹൃത്തുക്കള് ചേര്ന്ന് ആരംഭിച്ച ഭാരത് സിനി ഗ്രൂപ്പ് എന്ന നിര്മ്മാണ കമ്പനിയുടെ ‘തിരനോട്ടം’ എന്ന ചിത്രത്തിലാണ് മോഹന്ലാല് ആദ്യമായി അഭിനയിച്ചത്. 1978ല് നിര്മ്മിച്ച ഈ ചിത്രത്തില് ഒരു ഹാസ്യ വേഷമായിരുന്നു മോഹന്ലാല് കൈകാര്യം ചെയ്തത്. എന്നാല് ചില സാങ്കേതിക പ്രശ്നങ്ങളാല് ചിത്രം റിലീസ് ചെയ്തില്ല. 1980ല് ലാലിന്റെ ഇരുപതാമത്തെ വയസില് പുറത്തിറങ്ങിയ ‘മഞ്ഞില് വിരിഞ്ഞ പൂക്കളിലെ നരേന്ദ്രന് എന്ന വില്ലന് കഥാപാത്രം മോഹന്ലാലിന്റെ ജീവിതഗതി മാറ്റി മറിച്ചു. തുടര്ന്നങ്ങോട്ട് മോഹന്ലാലിന്റെ ജൈത്രയാത്ര തുടരുകയായിരുന്നു. 1983 ല് ഇരുപത്തിയഞ്ചോളം പടങ്ങളിലാണ് മോഹന്ലാല് അഭിനയിച്ചത്. വില്ലനായി വന്ന ലാല് പിന്നീട് നായകനായി മാറുകയായിരുന്നു.
മലയാള സിനിമയുടെ സുവര്ണ കാലഘട്ടം എന്നു വിശേഷിപ്പിക്കാവുന്ന എണ്പതുകളും തൊണ്ണൂറുകളും മോഹന്ലാല് എന്ന താരത്തിന്റെ കരിയറിലെയും ശ്രദ്ധേയ വര്ഷമാണ്. സത്യന് അന്തിക്കാട്, ലോഹിതദാസ്, സിബിമലയില്, ശ്രീനിവാസന്, ഫാസില്, ഐവി ശശി എന്നിങ്ങനെ അക്കാലത്തെ മികച്ച സംവിധായകര്ക്കും തിരക്കഥാകൃത്തുകള്ക്കുമൊപ്പം മോഹന്ലാല് ഒന്നിച്ചപ്പോള് പിറന്നത് മലയാളി എന്നും ഓര്ത്തിരിക്കുന്ന അതിമനോഹരമായ ഒരുപിടി ചിത്രങ്ങളാണ്.
പുരസ്കാരങ്ങള്:
ഇന്ത്യന് ചലച്ചിത്രങ്ങള്ക്ക് നല്കിയ സംഭാവനകള് പരിഗണിച്ച് 2001-ല് അദ്ദേഹത്തിന് രാജ്യത്തെ നാലാമത്തെ ഉയര്ന്ന സിവിലിയന് ബഹുമതിയായ പത്മശ്രീ പുരസ്കാരവും 2019 ല് രാജ്യത്തെ മൂന്നാമത്തെ ഉയര്ന്ന സിവിലിയന് ബഹുമതിയായ പത്മഭൂഷണ് ബഹുമതിയും നല്കി ഭാരത സര്ക്കാര് ആദരിച്ചു. 2009-ല് ഇന്ത്യന് ടെറിട്ടോറിയല് ആര്മിയില് ലഫ്റ്റനന്റ് കേണല് പദവി നല്കുകയും ചെയ്തു. ചലച്ചിത്ര ലോകത്തിനും സംസ്കൃത നാടകത്തിനും നല്കിയ സംഭാവനകളെ മാനിച്ച് കാലടി ശ്രീ ശങ്കരാചാര്യ സംസ്കൃത സര്വ്വകലാശാല ഡോക്ടറേറ്റ് നല്കിയും മോഹന്ലാലിനെ ആദരിച്ചിട്ടുണ്ട്. ഇന്ത്യന് സിനിമയ്ക്ക് നല്കിയ സംഭാവനകള്ക്ക്, 2019 ല് പത്മഭൂഷണ് ബഹുമതി നല്കി ആദരിച്ചു.