സമൂഹ മാധ്യമങ്ങളില് നടക്കുന്ന തെറ്റായ പ്രചരണങ്ങള്ക്ക് എതിരെ നടന് ഇന്നസെന്റ്. സിനിമയില് വന്നപ്പോള് ഒരു ആവേശത്തിന്റെ പേരില് ഇടതു പക്ഷക്കാരനായി പോയതാണെന്നും അത് തെറ്റാണെന്നും ഖേദിക്കുന്നുവെന്നും താന് എങ്ങും പറഞ്ഞിട്ടില്ലെന്ന് ഇന്നസെന്റ് പറഞ്ഞു. ഫേസ്ബുക്കിലൂടെയാണ് താരം പ്രതികരിച്ചത്.
താന് പറഞ്ഞെന്ന രീതിയില് പ്രചരിക്കുന്ന വ്യാജ സ്ക്രീന്ഷോട്ട് പങ്കുവച്ചാണ് അദ്ദേഹത്തിന്റെ മറുപടി. മരണം വരെ താന് ഇടതു പക്ഷക്കാരനായിരിക്കും എന്ന് അദ്ദേഹം മറുപടിയില് പറയുന്നു. എന്റെ പിതാവ് അടിയുറച്ച ഒരു കമ്മ്യൂണിസ്റ്റായിരുന്നുവെന്നും ആ രാഷ്ട്രീയത്തിന്റെ ചൂടറിഞ്ഞാണ് ഞാന് വളര്ന്നതും ജീവിച്ചതുമെന്നും അദ്ദേഹം പറഞ്ഞു. മരണം വരെ അതില് മാറ്റമില്ലെന്നും അദ്ദേഹം വ്യക്തമാക്കി.
എന്തെങ്കിലും പറയാനുണ്ടെങ്കില് ഞാന് തന്നെ പറഞ്ഞോളാം. മറ്റാരും ആ ഉത്തരവാദിത്വം ഏറ്റെടുക്കേണ്ടതില്ല. എന്റെ പേരില് ഇറക്കിയ മറ്റൊരു വ്യാജ പ്രസ്താവന കൂടി ഇന്ന് കാണുകയുണ്ടായി. അതുകൊണ്ട് മാത്രം പറഞ്ഞതാണെന്നും ഇന്നസെന്റ് വ്യക്തമാക്കി.
