കലാഭവന് മണിയുടെ സഹോദരനും നര്ത്തകനുമായ ആര്എല്വി രാമകൃഷ്ണന് കേരള ലളിത കലാ അക്കാദമിയില് മോഹിനിയാട്ടത്തിന് അവസരം നിഷേധിച്ച വിവാദത്തില് അക്കാദമി ചെയര്പേഴ്സണ് കെപിഎസി ലളിതയുടെ വാദം പൊളിയുന്നു. രാമകൃഷ്ണനും കെപിഎസി ലളിതയും തമ്മിലുള്ള ഫോണ് സംഭാഷണം പുറത്ത് വന്നു. സെക്രട്ടറിയുമായി രാമകൃഷ്ണന്റെ കാര്യം സംസാരിച്ചിട്ടുണ്ടെന്നും അപേക്ഷ സമര്പ്പിച്ചോളൂ എന്നും കെപിഎസി ലളിത ഫോണില് പറയുന്നുണ്ട്. ഇതിനിടെ കഴിഞ്ഞ ദിവസം ആത്മഹത്യക്ക് ശ്രമിച്ച രാമകൃഷ്ണന്റെ ആരോഗ്യസ്ഥിതിയില് ആശങ്ക വേണ്ടെന്ന് ഡോക്ടര്മാര് അറിയിച്ചു
സംഗീത നാടക അക്കാദമിയുടെ സര്ഗ്ഗ ഭൂമിക എന്ന ഓണ്ലൈന് കലാപരിപാടികള്ക്കായി അപേക്ഷ സമര്പ്പിക്കുന്നത് സംബന്ധിച്ച് രാമകൃഷ്ണനുമായി സംസാരിച്ചിട്ടില്ലെന്നും രാമകൃഷ്ണനു വേണ്ടി അക്കാദമി സെക്രട്ടറി രാധാകൃഷ്ണനോട് സംസാരിച്ചു എന്ന് പ്രചരിപ്പിച്ചത് ദുരുദ്ദേശപരവുമാണെന്നായിരുന്നു കെപിഎസി ലളിത ഇന്നലെ പ്രസ്താവനയിലൂടെ അറിയിച്ചത്. എന്നാല് കെപിഎസി ലളിതയും രാമകൃഷ്ണനും തമ്മില് നടത്തിയ സംഭാഷണം പുറത്ത് വന്നു. സെക്രട്ടറിയോട് സംസാരിച്ചിട്ടുണ്ടെന്നും അപേക്ഷ സമര്പ്പിച്ചോളൂ എന്നും സംഭാഷണത്തിനിടെ പറയുന്നുണ്ട്.
മോഹിനിയാട്ടത്തില് പിഎച്ച്ഡി ഉണ്ടായിട്ടും തനിക്ക് ജാതീയമായ വിവേചനം മൂലം അവസരം നിഷേധിച്ചു എന്നാണ് രാമകൃഷ്ണന്റെ വാദം. എന്നാല് പരിപാടിക്ക് അപേക്ഷ സ്വീകരിച്ച് തുടങ്ങിയിട്ടില്ല എന്നാണ് അക്കാദമിയുടെ നിലപാട്. പക്ഷേ അപേക്ഷ സമര്പ്പിച്ചോളൂ എന്ന് അക്കാദമി ചെയര് പേഴ്സണ് തന്നെ പറയുന്നത് ഫോണ് സംഭാഷണത്തില് വ്യക്തമാണ്. അവസരം നിഷേധിച്ചതില് മനം നൊന്ത് കഴിഞ്ഞ ദിവസം വൈകീട്ടാണ് ചാലക്കുടിയിലെ കലാഗൃഹത്തില് ഉറക്ക ഗുളികകള് കഴിച്ച് രാമകൃഷ്ണന് ആത്മഹത്യക്ക് ശ്രമിച്ചത്.
കറുകുറ്റിയിലെ സ്വകാര്യ ആശുപത്രിയില് കഴിയുന്ന രാമകൃഷ്ണന്റെ ആരോഗ്യ നിലയില് ആശങ്കപ്പെടാനില്ലെന്ന് ഡോക്ടര്മാര് അറിയിച്ചു. ജാതി വിവേചനമില്ലാത്തൊരു കലാലോകമുണ്ടാവട്ടെ എന്ന് എഴുതി വച്ചാണ് രാമകൃഷ്ണന് ആത്മഹത്യക്ക് ശ്രമിച്ചത്.
