കൊച്ചി: മാതാ അമൃതാനന്ദമയിക്ക് ഇന്ന് 70-ാം പിറന്നാള്‍. ജന്മനക്ഷത്രമായ കാര്‍ത്തിക നാളില്‍ ഒക്ടോബര്‍ മൂന്നിന് അമൃത വിശ്വവിദ്യാപീഠം അമൃതപുരി കാമ്ബസില്‍ ‘അമൃതവര്‍ഷം 70’ എന്നപേരില്‍ സപ്തതി ആഘോഷം നടക്കും.അതുകൊണ്ട് ഇന്ന് അമൃതപുരിയില്‍ കാര്യമായ ആഘോഷങ്ങളില്ല.ഒക്ടോബര്‍ മൂന്നിന് രാവിലെ അമൃതാനന്ദമയി മഠം വൈസ് ചെയര്‍മാൻ സ്വാമി അമൃതസ്വരൂപാനന്ദപുരിയുടെ നേതൃത്വത്തില്‍ ഗുരുപാദ പൂജ നടക്കും.
പിന്നാലെ മാതാ അമൃതാനന്ദമയി ജന്മദിനസന്ദേശം നല്‍കും. പ്രകൃതിസംരക്ഷണമെന്ന സന്ദേശവുമായി ഐക്യരാഷ്ട്രസഭയിലെ 193 രാജ്യങ്ങളില്‍നിന്നുള്ള പ്രതിനിധികള്‍ ആഘോഷത്തില്‍ പങ്കെടുക്കും. അമൃതകീര്‍ത്തി പുരസ്കാരവിതരണം, സമൂഹവിവാഹം, വസ്ത്രവിതരണം, സ്ത്രീകള്‍ക്കായി ആരംഭിച്ച തൊഴില്‍ പരിശീലനപരിപാടിയുടെ ആദ്യബാച്ചിലെ 3000 പേര്‍ക്കുള്ള സര്‍ട്ടിഫിക്കറ്റ് വിതരണം തുടങ്ങിയവയും ആഘോഷത്തിന്റെ ഭാഗമായി നടക്കും.
മഠത്തിന് കീഴിലുള്ള എല്ലാ സ്ഥാപനങ്ങളും സപ്തതി ആഘോഷം പ്രമാണിച്ച്‌ സേവനവാരം ആചരിക്കുന്നുണ്ട്. ഇന്ന് ആരംഭിച്ച്‌ ഒക്ടോബര്‍ രണ്ടിന് അമൃതപുരിയില്‍ എത്തുന്ന വിധം വിവിധ ഭാഗങ്ങളില്‍ നിന്ന് രഥഘോഷയാത്രകളും നടക്കും.
