പ്രധാനമന്ത്രി നരേന്ദ്ര മോദി സപ്തതി നിറവില്‍. ഇന്നത്തെ ഇന്ത്യന്‍ രാഷ്ട്രീയത്തില്‍ മോദിയെന്ന മഹാമേരുവിനോളം തലപ്പൊക്കം ഒരു നേതാവിനുമില്ല. സേവ സപ്ത എന്നപേരില്‍ ഏഴുനാള്‍ നീണ്ടു നില്‍ക്കുന്ന പ്രചാരണ പരിപാടികളാണ് ബിജെപി സംഘടിപ്പിച്ചിട്ടുള്ളത്.
പ്രധാനമന്ത്രി നരേന്ദ്ര മോദിയുടെ 70-ാം പിറന്നാള്‍ ദിനത്തില്‍ ആശംസകളുമായി റഷ്യന്‍ പ്രസിഡന്റ് വ്‌ലാഡിമിര്‍ പുടിന്‍. സപ്തതിയുടെ നിറവില്‍ നില്‍ക്കുന്ന പ്രധാനമന്ത്രിക്ക് അദ്ദേഹം എല്ലാ ആശംസകളും നേരുന്നു. ഇന്ത്യയിലെ റഷ്യന്‍ എംബസി ട്വിറ്ററിലൂടെയാണ് ഇക്കാര്യം അറിയിച്ചത്. ഇന്ത്യക്ക് അകത്തു നിന്നും പുറത്തുനിന്നുമുള്ള പ്രമുഖ രാഷ്ട്രീയ നേതാക്കളെല്ലാവരും തന്നെ പ്രധാനമന്ത്രിയ്ക്ക് ജന്മദിനാശംസകള്‍ നേര്‍ന്നിരുന്നു.
സമീപകാലത്ത് ഇന്ത്യയുമായി അഭിപ്രായ ഭിന്നതകള്‍ ഉണ്ടായിരുന്ന നേപ്പാള്‍ പ്രധാനമന്ത്രി കെ.പി ശര്‍മ്മ ഒലിയും മോദിക്ക് ആശംസകള്‍ നേര്‍ന്നിരുന്നു. രാഷ്ട്രപതി രാം നാഥ് കോവിന്ദ്, കേന്ദ്ര ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്‌നാഥ് സിംഗ്, കോണ്‍ഗ്രസ് നേതാവ് രാഹുല്‍ ഗാന്ധി, വ്യോമയാന മന്ത്രി ഹര്‍ദീപ് സിംഗ് പുരി എന്നിവരും ആശംസകളുമായി രംഗത്തെത്തി.
ഗുജറാത്തിലെ വഡ്‌നഗറില്‍ നിന്ന് പ്രധാനമന്ത്രിയുടെ വസതിവരെയെത്തിയ വിസ്മയകരമായ ജീവിതയാത്ര. ചായ വില്‍പ്പനയും പതിനേഴാം വയസില്‍ വീടുവിട്ടിറങ്ങിയതും ആര്‍എസ്എസ് സ്വയംസേവകനില്‍ നിന്ന് ബിജെപി നേതാവിലേയ്ക്കും ഗുജറാത്ത് മുഖ്യമന്ത്രിയിലേയ്ക്കും ഒടുവില്‍ കരുത്തുറ്റ പ്രധാനമന്ത്രിയിലേയ്ക്കുമുള്ള വളര്‍ച്ച പറഞ്ഞുപറഞ്ഞ് ജനമനസുകളില്‍ പതിഞ്ഞുകിടപ്പുണ്ട്. ഈ പിറന്നാള്‍ വര്‍ഷം മോദിയെന്ന ഭരണാധികാരിക്കു മുന്നിലുള്ളത് സമാനതകളില്ലാത്ത വെല്ലുവിളികളാണ്.
സാമ്പത്തിക പ്രതിസന്ധിയുടെ കഠിനതകള്‍, കോവിഡ് ഭീതി, തൊഴിലാളികളുടെ പലായനം, കര്‍ഷക അസംതൃപ്തി, അതിര്‍ത്തുകള്‍ അശാന്തമാക്കുന്ന ചൈനയും പാക്കിസ്ഥാനും നേപ്പാളും. എന്നാല്‍ മോദിയെ കേന്ദ്രീകരിച്ച് മാത്രമാണ് ഇന്ത്യന്‍ രാഷ്ട്രീയത്തിലെ നിലവിലെ ചര്‍ച്ചകള്‍. ഒത്തൊരു എതിരാളി പ്രതിപക്ഷ നിരയിലില്ല. മോദിയില്‍ ജനമേല്‍പ്പിച്ച വിശ്വാസത്തിന് ഇടവുതട്ടിയിട്ടുമില്ല. 2014 ഒറ്റത്തവണത്തെ അത്ഭുതമല്ലായിരുന്നുവെന്ന് 2019 തെളിയിച്ചു. മാഹാമാരിയോടുള്ള മഹായുദ്ധം മുന്നില്‍ നിന്ന് നയിക്കുന്നു.
അയോധ്യയില്‍ ശിലയിട്ടും ജമ്മുകശ്മീരിന്റെ ഭരണഘടപദവി റദ്ദാക്കിയും പ്രകടന പ്രത്രികയിലെ വാഗ്ദാനങ്ങള്‍ രണ്ടാം ഇന്നിങ്‌സില്‍ യഥാര്‍ഥ്യമാക്കി. സാമൂഹികക്ഷേമ പദ്ധതികളില്‍ നിന്ന് ആത്മനിര്‍ഭര്‍ ഭാരതില്‍ എത്തി നില്‍ക്കുന്നു മോദി ഭരണത്തിലെ ചുവടുവയ്പ്പുകള്‍.
