കൊല്ക്കത്ത: യൂണിവേഴ്സല് റിക്കോര്ഡ് ഫോറം ഏര്പ്പെടുത്തിയ ലൈഫ് ടൈം അച്ചീവ്മെന്റ് അവാര്ഡ് ഐക്യരാഷ്ട്ര സഭയുടെ സുസ്ഥിര വികസന ലക്ഷ്യങ്ങളുടെ അംബാസിഡര് തലവടി വാലയില് ബെറാഖാ ഭവനില് ഡോ.ജോണ്സണ് വി.ഇടിക്കുളയ്ക്ക് ലഭിച്ചു. മാര്ച്ച് 5ന് കൊല്ക്കത്ത മരിയറ്റ് ഇന്റര്നാഷണല് ഹോട്ടലില് നടന്ന ചടങ്ങില് പ്രശസ്ത സിനിമ താരം ജോയി ബാനര്ജി പ്രശസ്തി പത്രവും അവാര്ഡും സമ്മാനിച്ചു. വെസ്റ്റ് ബംഗാള് മുന്മന്ത്രി മദന് മിത്ര എംഎല്എ പൊന്നാട അണിയിച്ചു ആദരിച്ചു.
ന്യൂയോര്ക്ക് സ്റ്റേറ്റ് അസംബ്ലി ഏര്പ്പെടുത്തിയ മാര്ട്ടിന് ലൂഥര് കിംങ്ങ് ഔട്ട്സ്റ്റാന്റിങ്ങ് കമ്മ്യൂണിറ്റി സര്വീസ് അവാര്ഡ് കഴിഞ്ഞ മാസം ലഭിച്ചിരുന്നു. കേന്ദ്ര-സംസ്ഥാന സര്ക്കാരുകളുടെ യൂത്ത് അവാര്ഡ് ,മദര് തെരേസ പീസ് അവാര്ഡ് ഉള്പ്പെടെ നിരവധി പുരസ്ക്കാരങ്ങള്ക്ക് അര്ഹനായിട്ടുള്ള ഡോ.ജോണ്സണ് വി.ഇടിക്കുള കഴിഞ്ഞ 25 വര്ഷമായി ജീവകാരുണ്യ – സാമൂഹിക മനുഷ്യാവകാശ – സമാധാന പൊതുപ്രവര്ത്തനങ്ങള്ക്ക് നല്കുന്ന സമഗ്ര സംഭാവനകളെ പരിഗണിച്ചാണ് ലൈഫ് ടൈം അച്ചീവ്മെന്റ് അവാര്ഡിന് തെരെഞ്ഞെടുത്തത്.
മുന്മന്ത്രി മദന് മിത്ര എംഎല്എ രക്ഷാധികാരിയും ഡോ.ബെര്നാര്ഡ് ഹോളെ, ഗിന്നസ് ഡോ. സുവദീപ് ചാറ്റര്ജി, ഗിന്നസ് ഡോ.സുനില് ജോസഫ് എന്നിവര് അംഗങ്ങളായുള്ള സമിതിയാണ് അവാര്ഡിന് തെരെഞ്ഞെടുത്തത്. നാഷണല് ഫോറം ഫോര് സോഷ്യല് ജസ്റ്റിസ് ന്യൂനപക്ഷ സമിതി ദേശീയ അദ്ധ്യക്ഷ്യന്, ഹ്യൂമന് റൈറ്റ്സ് പ്രൊട്ടക്ഷന് കൗണ്സില് ഓഫ് ഇന്ത്യ സംസ്ഥാന ചെയര്മാന്, കേരള യുവജനക്ഷേമ ബോര്ഡ് യൂത്ത് അവാര്ഡീസ് അസോസിയേഷന് ജനറല് സെക്രട്ടറി, സൗഹൃദ വേദി പ്രസിഡന്റ് എന്നീ ചുമതലകളും വഹിക്കുന്നു. സൗദ്യ അറേബ്യ മിനിസ്ട്രി ഓഫ് ഹെല്ത്ത് അല്ഖുര്മ ഹോസ്പിറ്റല് നേഴ്സിങ്ങ് ഡയറക്ടര് ജിജിമോള് ജോണ്സണ് ഭാര്യയും ബെന്, ദാനിയേല് എന്നിവര് മക്കളുമാണ്.