സംസ്ഥാനത്ത് ഡിജിറ്റല്‍ പഠനത്തിന് സൗകര്യമില്ലാത്ത കുട്ടികളുടെ കണക്ക് നാളെത്തന്നെ തയാറാക്കാന്‍ ഡിഇഒ- എഇഒമാര്‍ക്ക് വിദ്യാഭ്യാസ ഡയറക്ടറുടെ സര്‍ക്കുലര്‍. നാളെ സ്‌കൂളുകളില്‍ ഈ കണക്കെടുത്ത ശേഷം, ഈ മാസം 13 നകം എല്ലാ വിദ്യാര്‍ത്ഥികള്‍ക്കും ഡിജിറ്റല്‍ പഠനത്തിന് അവസരമൊരുക്കണമെന്നാണ് നിര്‍ദേശം.
കണക്ടിവിറ്റി, സൗകര്യം എന്നിവ ഇല്ലാത്ത കുട്ടികള്‍ക്ക് ഇവ ഉറപ്പാക്കാണമെന്നാണ് സര്‍ക്കുലറില്‍ നിര്‍ദ്ദേശിച്ചിരിക്കുന്നത്. വൈദ്യുതി, ക്ലാസുകള്‍ കാണാന്‍ ടിവി, ഫോണ്‍, ലാപ്‌ടോപ് ഇവ ഉറപ്പാക്കാണമെന്നാണ് നിര്‍ദേശം. നാളെ തന്നെ സ്‌കൂളുകളില്‍ കണക്ക് എടുക്കണമെന്നും ജൂണ്‍ 13 ന് മുമ്പ് ഇവ ഉറപ്പാക്കാനുള്ള പ്രവര്‍ത്തനം നടത്തുമെന്നുമാണ് നിര്‍ദ്ദേശം നല്‍കിയിരിക്കുന്നത്. ഇതിനായി എല്ലാ ജില്ലകളിലും കോര്‍ഡിനേഷന്‍ കമ്മിറ്റികള്‍ രൂപികരിക്കും.
സ്‌കൂള്‍ തലം, ഉപജില്ല, ജില്ലാതലം എന്നിങ്ങനെ തിരിച്ചാണ് പ്രവര്‍ത്തനങ്ങള്‍ ഏകോപിപ്പിക്കേണ്ടത്. ഇതിനായി എല്ലാ ജില്ലകളിലും ഏകോപന സമിതികള്‍ രൂപീകരിക്കും. ദിവസേനയെന്നോണം പ്രവര്‍ത്തനം നടത്തണമെന്നും ഓരോ ദിവസവും റിപ്പോര്ട്ട് നല്‍കണമെന്നും നിര്‍ദേശമുണ്ട്.
സ്‌പോണ്‍സര്‍ ചെയ്യാന്‍ സന്നദ്ധരായ വ്യക്തികള്‍, എല്ലാ തലത്തിലുമുള്ള ജനപ്രതിനിധികള്‍, മറ്റു സാമൂഹ്യ സംഘടനകള്‍, ഉദ്യോഗസ്ഥര്‍ എന്നിവരുടെ പങ്കാളിത്തം ഉറപ്പാക്കണമെന്നും ഡിജിഇ സര്‍ക്കുലറില്‍ പറയുന്നു.
