കല്പ്പറ്റ: മുണ്ടക്കൈ ഉരുള്പൊട്ടല് ദുരന്തത്തില് കാണാതായവരുടെ ബന്ധുക്കളെ ഉള്പ്പെടുത്തി ജനകീയ തിരച്ചില് തുടങ്ങി. രാവിലെ ആറ് മണിക്ക് തുടങ്ങിയ തിരച്ചില് മുതല് 11 മണിയോടെ അവസാനിപ്പിക്കാനാണ് നിലവിലെ തീരുമാനം.
ദുരിതാശ്വാസ ക്യാമ്പുകളിലും ബന്ധുവീടുകളിലും മറ്റുമായി കഴിയുന്നവരില് 190 പേര് തിരച്ചലില് പങ്കെടുക്കാന് രജിസ്റ്റര് ചെയ്തിട്ടുണ്ട്. ജനപ്രതിനിധികള്, എന്ഡിആര്എഫ്, പൊലീസ്, ഫയര്ഫോഴ്സ്, റവന്യൂ സംഘത്തിനൊപ്പം ഇവരും തിരച്ചലില് പങ്കാളികളാവുന്നുണ്ട്. രാവിലെ തുടങ്ങി വൈകിട്ട് വരെ തിരച്ചില് നടത്താനായിരുന്നു നേരത്തേ തീരുമാനിച്ചിരുന്നതെങ്കിലും പ്രധാനമന്ത്രിയുടെ സന്ദര്ശനവുമായി ബന്ധപ്പെട്ട നിയന്ത്രണങ്ങള് കാരണം 11 മണിക്ക് അവസാനിപ്പിക്കും.
ആവശ്യമെങ്കില് മറ്റൊരു ദിവസം ജനകീയ തിരച്ചില് തുടരുമെന്നും മന്ത്രി മുഹമ്മദ് റിയാസ് അറിയിച്ചു. നിലവില് ദുരന്തത്തില് കാണാതായവരുടെ പട്ടികയില് 131 പേരാണുള്ളത്. ഇവരില് കൂടുതല് പേരും പുഞ്ചിരിമട്ടം, മുണ്ടക്കൈ, സ്കൂള് റോഡ് ഭാഗങ്ങളില് നിന്നുള്ളവരാണെന്നും മന്ത്രി പറഞ്ഞു.
നിലവില് ക്യാമ്പുകളിലും ബന്ധുവീടുകളിലും മറ്റും കഴിയുന്നവരുടെ അടിയന്തര പുനരധിവാസത്തിനായി 27 പിഡബ്ല്യുഡി ക്വാര്ട്ടേഴ്സുകളും മറ്റ് സര്ക്കാര് വകുപ്പുകളുടെ ക്വാര്ട്ടേഴ്സുകളും സ്വകാര്യ വ്യക്തികളുടെ വീടുകളും ഉള്പ്പെടെ നൂറോളം കെട്ടിടങ്ങള് സജ്ജമായിക്കഴിഞ്ഞതായും മന്ത്രി അറിയിച്ചു. ഇവയുടെ പെയിന്റിംഗ് ഉള്പ്പെടെയുള്ള അറ്റകുറ്റപ്പണികളും ശുചീകരണ പ്രവൃത്തികളും യുദ്ധകാലാടിസ്ഥാനത്തില് പുരോഗമിക്കുകയാണ്.
