ഇടുക്കി : കൊള്ളപ്പലിശ സംഘത്തെ പിടികൂടാന്‍ ഇടുക്കി ചിന്നക്കനാലിലെത്തിയ കായംകുളം പൊലീസ് സംഘത്തിനു നേരെ ആക്രമണം . അക്രമത്തില്‍ സിവില്‍ പൊലീസ് ഓഫിസര്‍ ദീപക്കിനെ അക്രമിസംഘം കുത്തി പരുക്കേല്‍പ്പിച്ചു. പരുക്കേറ്റ ദീപക്കിനെ മൂന്നാര്‍ ടാറ്റ ആശുപത്രിയില്‍ പ്രവേശിപ്പിച്ചു. പുലര്‍ച്ചെ രണ്ടുമണിയോടെയാണു സംഭവം.കഴുത്തിലും കൈക്കും കാലിനുമാണ് പരുക്കേറ്റത്.
ദിപക്കിനെ വയറില്‍ കുത്തിയ ഷിനു അടക്കം മൂന്നുപേരെ ശാന്തന്‍പാറ പൊലീസ് അറസ്റ്റ്‌ചെയ്തു. പൊലീസ് വന്ന വാഹനത്തിന്റെ താക്കോല്‍ ഊരിയെടുത്ത 10 പേരടങ്ങുന്ന അക്രമിസംഘം പ്രതികളുമായി കടന്നുകളയാന്‍ ശ്രമിച്ചു. ഉടന്‍തന്നെ പൊലീസ് സംഘം ആലപ്പുഴ എസ്പിയെ വിവരം അറിയിച്ചു. ആലപ്പുഴ എസ്പി ഇടുക്കി എസ്പിയെ വിവരം അറിയിച്ചതിന്റെ പശ്ചാത്തലത്തില്‍ അഞ്ചുസ്ഥലങ്ങളില്‍നിന്ന് പൊലീസ് എത്തിയാണ് അക്രമികളെ പിടികൂടിയത്.
പ്രതികള്‍ ഒളിച്ച് താമസിച്ചിരുന്ന റിസോര്‍ട്ടില്‍ നിന്നാണ് മൂന്നു പേരെയും പിടികൂടിയത്.എസ്‌ഐ അടക്കം അഞ്ചുപേരാണ് പൊലീസ് സംഘത്തിലുണ്ടായിരുന്നത്. കൃഷ്ണപുരത്തെ ഹോട്ടല്‍ ഉടമയെ കാറില്‍ കയറ്റിക്കൊണ്ടുപോയി മര്‍ദിച്ച കേസ് അന്വേഷിക്കുന്നതിന്റെ ഭാഗമായാണ് അക്രമി സംഘത്തെ തേടി പോലീസ് ഇടുക്കിയിലെത്തിയത്.
