സമൂഹ മാധ്യമങ്ങളില് ഏറെ ചര്ച്ചയായ വറുത്തരച്ച മയില്കറി വിവാദത്തില് ട്വിസ്റ്റ്. അവസാന നിമിഷം മയിലിനെ കറിവെക്കാനുള്ള തീരുമാനത്തില് നിന്ന് യൂട്യൂബര് ഫിറോസ് ചുട്ടിപ്പാറ പിന്മാറി. 20000 രൂപ നല്കി വാങ്ങിയ മയിലിനെ പാലസിന് കൈമാറി. പകരം കോഴിക്കറി വെക്കുന്ന വീഡിയോ പോസ്റ്റ് ചെയ്തു. മയില് നമ്മുടെ ദേശീയ പക്ഷിയാണെന്നും ആരും മയിലിനെ കൊല്ലരുതെന്നും ആരെങ്കിലും മയിലിനെ കറിവെക്കുമോ എന്നും ഫിറോസ് വീഡിയോയില് പറയുന്നു.
പാചക വീഡിയോകളിലൂടെ ശ്രദ്ധേയനായ ഫിറോസിന്റെ അടുത്തിടെ ഒരു പുതിയ വീഡിയോ പോസ്റ്റ് ചെയ്തതിന് പിറകെ വലിയ വിവാദം പൊട്ടിപ്പുറപ്പെട്ടിരുന്നു. താന് യുഎഇയില് പോയി മയിലിനെ കറിവയ്ക്കുമെന്ന് ഫിറോസ് ഒരു വീഡിയോയില് പ്രഖ്യാപിച്ചിരുന്നു. ഈ വീഡിയോയെത്തുടര്ന്നാണ് വിവാദമുണ്ടായത്.
ഷാര്ജയില് നിന്ന് മയിലിനെ വാങ്ങുന്നതിന്റെ വീഡിയോയും ഫിറോസ് പങ്കുവച്ചിരുന്നു. 20000 രൂപയോളം വില നല്കിയായിരുന്നു ഫിറോസ് ഒരു ഇറച്ചിക്കടയില് നിന്ന് മയിലിനെ വാങ്ങിയത്. വാങ്ങിയ ഒപ്പം തിങ്കളാഴ്ച രാത്രി മയിലിനെ കറിവയ്ക്കുന്ന വീഡിയോ പോസ്റ്റ് ചെയ്യുമെന്നും യൂട്യൂബര് അറിയിച്ചിരുന്നു.
തിങ്കളാഴ്ച രാത്രി തന്നെ ഫിറോസ് വീഡിയോ പോസ്റ്റ് ചെയ്തു. ”വറുത്തരച്ച മയില് കറി,” എന്ന് ടൈറ്റിലിലോട് കൂടിയായിരുന്നു വീഡിയോ. പക്ഷേ വീഡിയോയില് ഒരു ട്വിസ്റ്റുമുണ്ടായിരുന്നു. മയിലിനെ കറിവച്ചില്ല എന്നതാണ് ആ ട്വിസ്റ്റ്.
താന് വാങ്ങിയ മയിലിനെ പാലസ് അധികൃതര്ക്ക് ഫിറോസ് കൈമാറുകയായിരുന്നു. ”മയിലിനെ ആരെങ്കിലും കറി വെക്കുമോ. മനുഷ്യന് ആരെങ്കിലും ചെയ്യുമോ. ഇത്ര ഭംഗിയുള്ള പക്ഷിയാണത്. നമ്മള് ഒരിക്കലും ചെയ്യില്ല”-ഫിറോസ് പറയുന്നു. മയിലിന് പകരം ഒരു കോഴിയെയാണ് വീഡിയോയില് ഫിറോസ് കറിവച്ചത്. മയിലിനെ കറിവയ്ക്കാതെ ഒരു കോഴിയെ കറിവച്ചതിനെക്കുറിച്ച് വീഡിയോയ്ക്ക് താഴെ രസകരമായ കമന്റുകളും വന്നിട്ടുണ്ട്.
മയിലിനെ കറിവെക്കാന് ഫിറോസ് ദുബൈയില് പോയതു മുതല് വിവാദമായിരുന്നു. സോഷ്യല് മീഡിയയിലായിരുന്നു ചര്ച്ച ഏറെ. ദേശീയ പക്ഷിയായ മയിലിനെ കറിവെക്കുന്നതിനെതിരെ ഒരുവിഭാഗം രംഗത്തെത്തി. ദുബൈയിലെത്തിയ ഫിറോസ് വലിയ തുക നല്കി മയിലിനെ വാങ്ങുകയും ചെയ്തിരുന്നു. ഇന്ത്യയില് ദേശീയ പക്ഷിയായ മയിലിനെ കൊല്ലുന്നത് കുറ്റകരമാണ്.
മയിലിനെ കറിവയ്ക്കുമെന്ന് ഫിറോസിന്റെ വീഡിയോയില് പറഞ്ഞതിന് പിറകെ അദ്ദേഹത്തിനെതിരെ വലിയ രീതിയില് സൈബര് ആക്രമണം നടന്നിരുന്നു. ഇതോടെ ഇത് സംബന്ധിച്ച് വലിയ ചര്ച്ചകള് സാമൂഹ്യ മാധ്യമങ്ങളില് ഉയരുകയും ചെയ്തിരുന്നു.
ഏറെ കാഴ്ചക്കാരും ആരാധകരമുള്ള ഫുഡ് വ്ലോഗറാണ് ഫിറോസ് ചുട്ടിപ്പാറ. ഭക്ഷണത്തിലെ വൈവിധ്യമാണ് പ്രത്യേകത. അങ്ങനെയാണ് മയില് കറിയില് എത്തിയത്. ഇന്ത്യയില് നിയമ വിധേയമല്ലാത്തിനാലാണ് അദ്ദേഹം മയില്കറി വെക്കാനായി ദുബൈയിലേക്ക് പോയത്. എന്നാല്, മയിലിനെ കറി വെച്ചാല് നാട്ടില് കാലുകുത്താന് അനുവദിക്കില്ലെന്ന് വരെ ഭീഷണിയുയര്ന്നു.