കുമളി: കുമളിയില്‍ അതിഥി തൊഴിലാളിയെ ആക്രമിച്ച് എക്സൈസ് ഉദ്യോഗസ്ഥര്‍ ചമഞ്ഞ് പണം തട്ടിയ സംഭവത്തില്‍ നാല് പേര് പിടിയില്‍. നെടുങ്കണ്ടം സ്വദേശികളായ പച്ചടി പള്ളിക്കടവില്‍ അനൂപ്, പുല്‍പ്പാറ പുത്തന്‍ വീട്ടില്‍ സവിന്‍, തെക്കേപറമ്പില്‍ മഹേഷ്, ആറാട്ടുചാണില്‍ ആഷിന്‍ എന്നിവരാണ് പിടിയിലായത്.
മത്സ്യ വ്യാപാര സ്ഥാപനത്തില്‍ ജോലി ചെയ്ത് വരുന്ന അതിഥി തൊഴിലാളിയെയാണ് സംഘം ആക്രമിച്ചത്. തുടര്‍ന്ന് സമീപത്തുളള ലോഡ്ജില്‍ എത്തി എക്സൈസ് ഉദ്യോഗസ്ഥരെന്ന വ്യാജേന ആളുകളില്‍ നിന്ന് പണം തട്ടുകയായിരുന്നു.
സംഭവം ഇങ്ങനെ
ബാറില്‍ കയറി മദ്യപിച്ച ശേഷം പുറത്തിയ സംഘം അതിഥി തൊഴിലാളി ബിയറുമായി വരുന്നത് കണ്ടു. തുടര്‍ന്ന് ബിയര്‍ തങ്ങള്‍ക്ക് നല്‍കണമെന്ന് ആവശ്യപ്പെട്ടു. എന്നാല്‍ തൊഴിലാളി ഇതിന് വഴങ്ങാതെ കടയിലേക്ക് കയറിപ്പോയി. തുടര്‍ന്ന് നാലംഗ സംഘം തൊഴിലാളിയെ കടക്കുള്ളിലിട്ട് ക്രൂരമായി മര്‍ദ്ദിക്കുകയായിരുന്നു. പിന്നീട് മദ്യപിക്കുന്നതിന് പണം കണ്ടെത്തുന്നതിനായി സംഘം എക്സൈസ് ഉദ്യോഗസ്ഥര്‍ ചമഞ്ഞ് കുമളിയിലെ ലോഡ്ജില്‍ എത്തി മുറികളില്‍ പരിശോധന നടത്തി. ഒരാളുടെ ബാഗില്‍ നിന്നും 1250 രൂപ എടുക്കുകയും ചെയ്തു. പുറത്ത് പറഞ്ഞാല്‍ കള്ളക്കേസില്‍ കുടുക്കുമെന്ന് ഭീഷണിപ്പെടുത്തുകയും ചെയ്തു.
അതിഥി തൊഴിലാളിയെ മര്‍ദ്ദിച്ച കേസില്‍ പൊലീസ് അന്വേഷണം നടത്തുന്നതിനിടെയാണ് എക്സൈസ് ഉദ്യോഗസ്ഥരെന്ന പേരില്‍ നാലുപേര്‍ ലോഡ്ജില്‍ അക്രമം നടത്തിയ കാര്യം അറിയുന്നത്. തുടര്‍ന്ന് കുമളി ഒന്നാംമൈലിലെ സ്വകാര്യ കടകളില്‍ ജോലി ചെയ്തിരുന്ന ഇവരെ പിടികൂടുകയായിരുന്നു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.
