പെരുമ്പാവൂര്‍ : ട്രാവന്‍കൂര്‍ റയോണ്‍സിലെ താഴ്ന്ന വരുമാനക്കാരായ തൊഴിലാളികള്‍ക്കുള്ള ഇന്‍ഡസ്ട്രിയല്‍ ഹൗസിംഗ് പദ്ധതി ക്വാര്‍ട്ടേഴ്സില്‍ ഇപ്പോള്‍ താമസിച്ചു വരുന്നവര്‍ക്ക് പട്ടയം നല്‍കുമെന്ന് റവന്യു വകുപ്പ് മന്ത്രി ഇ. ചന്ദ്രശേഖരന്‍ അറിയിച്ചു. ഈ വിഷയവുമായി ബന്ധപ്പെട്ട് നിയമസഭയില്‍ അഡ്വ. എല്‍ദോസ് കുന്നപ്പിള്ളി എം.എല്‍.എ അവതരിപ്പിച്ച ഉപക്ഷേപത്തിന് മറുപടി നല്‍കുകയായിരുന്നു മന്ത്രി.
രേഖകളില്‍ ഇന്‍ഡസ്ട്രിയല്‍ ക്വാര്‍ട്ടേഴ്സ് ആയി കിടക്കുന്ന ഇവിടെ പതിറ്റാണ്ടുകളായി താമസിക്കുന്ന അന്‍പതോളം കുടുംബങ്ങള്‍ക്ക് ഇതുവരെയും പട്ടയം ലഭിച്ചിട്ടില്ല. 1963 ല്‍ റയോണ്‍സ് മാനേജ്മെന്റും ജില്ല കളക്ടറും ചേര്‍ന്ന് ഉണ്ടാക്കിയ ധാരണയുടെ അടിസ്ഥാനത്തില്‍ തൊഴിലാളികള്‍ക്ക് ഈ കെട്ടിടവും സ്ഥലവും വാടകക്ക് കൊടുക്കുകയും 12 വര്‍ഷം വാടക പിരിച്ചു സര്‍ക്കാരില്‍ അടച്ചു പിന്നീട് ചെറിയ തുക ഈടാക്കി കെട്ടിടവും സ്ഥലവും പതിച്ചു നല്‍കാനും വ്യവസ്ഥ ചെയ്തിരുന്നു. എന്നാല്‍ ഈ വ്യവസ്ഥ പിന്നീട് പാലിക്കപ്പെട്ടില്ലെന്നു അഡ്വ. എല്‍ദോസ് കുന്നപ്പിള്ളി ചൂണ്ടിക്കാട്ടി.
2002 ല്‍ ഇവിടെ താമസിക്കുന്നവര്‍ ബഹു. ഹൈക്കോടതിയെ സമീപിച്ചു അനുകൂലവിധി സമ്പാദിച്ചിരുന്നെങ്കിലും തുടര്‍ നടപടികള്‍ ഒന്നും ഉണ്ടായില്ല. നിവേദനങ്ങള്‍ അനവധി നല്‍കിയെങ്കിലും യാതൊരുവിധ തീരുമാനങ്ങളും ഈ വിഷയത്തില്‍ എടുക്കുവാന്‍ സാധിച്ചില്ല.
ഇരുപത്തിയഞ്ച് ഇരട്ട വീടുകളില്‍ അന്‍പത് കുടുംബങ്ങളാണ് ഇവിടെ താമസിച്ചു വരുന്നത്. ഓരോ കുടുംബങ്ങളും നാലു മുതല്‍ ആറ് വരെ സെന്ററുകളില്‍ താമസിക്കുന്നവരും. ഇവിടുത്തെ താമസക്കാരില്‍ ഏറെയും വിധവകളാണ്. കെട്ടിടങ്ങള്‍ ആകട്ടെ കാലപ്പഴക്കത്താല്‍ ജീര്‍ണ്ണവസ്ഥയിലും. ഉടമസ്ഥാവകാശം ലഭിക്കാത്തതിനാല്‍ സര്‍ക്കാരില്‍ നിന്നോ തദ്ദേശ സ്വയംഭരണ സ്ഥാപനങ്ങളില്‍ നിന്നോ വീട് മെയിന്റനന്‍സിനുള്ള സഹായവും ലഭ്യമല്ല. കമ്പനി പൂട്ടിയതിനാല്‍ ഇവര്‍ കൂലിപ്പണി എടുത്താണ് ജീവിക്കുന്നതെന്ന് എം.എല്‍.എ സബ്മിഷനില്‍ ഉന്നയിച്ചു.
നിലവില്‍ ട്രാവന്‍കൂര്‍ റയോണ്‍സ് ക്വാര്‍ട്ടേഴ്സില്‍ താമസിച്ചു വരുന്ന തൊഴിലാളികള്‍ക്കും മരിച്ചു പോയ തൊഴിലാളികളുടെ നിയമാനുസൃത അവകാശികള്‍ക്കും അവര്‍ താമസിച്ചു വരുന്ന ക്വാര്‍ട്ടേഴ്സ് വാടക കുടിശികയും ഭൂമി, കെട്ടിട വില എന്നിവ ഈടാക്കി പതിച്ചു നല്‍കുന്നതിന് നടപടി സ്വീകരിക്കുമെന്ന് മന്ത്രി നിയമസഭയെ അറിയിച്ചു.
