തെരുവ് നായ ശല്യം നിയമസഭയില് ഉന്നയിച്ച് പ്രതിപക്ഷം. വാക്സിന്റെ ഗുണ നിലവാരത്തില് ആശങ്കയുണ്ടെന്ന് പ്രതിപക്ഷ നേതാവ് വി.ഡി സതീശന് നിയമസഭയില് പറഞ്ഞു. ഗുണ നിലവാരമില്ലാത്ത വാക്സിന് വിതരണം ചെയ്തിട്ടില്ലെന്ന് ആരോഗ്യമന്ത്രി വീണാ ജോര്ജ് പറഞ്ഞു. എന്നാല് ഗുണ നിലവാരം പഠിക്കാന് വിദഗ്ധ സമിതിയെ ആരോഗ്യ വകുപ്പ് നിയോഗിക്കണമെന്ന് വീണാ ജോര്ജിനെ തിരുത്തി മുഖ്യമന്ത്രി നിര്ദേശിച്ചു.
അതേസമയം സംസ്ഥാനത്ത് ഈ വര്ഷം പേവിഷ ബാധയേറ്റ് 20 പേര് മരിച്ചുവെന്ന് ആരോഗ്യമന്ത്രി വീണാ ജോര്ജ് നിയമസഭയില് പറഞ്ഞു. ഇതില് 15 പേര് വാക്സിനെടുത്തിട്ടില്ലെന്നും മന്ത്രി സഭയെ അറിയിച്ചു. തെരുവ് നായ ശല്യം ചര്ച്ച ചെയ്യണമെന്ന് ആവശ്യപ്പെട്ട് പ്രതിപക്ഷം നല്കിയ അടിയന്തര പ്രമേയ നോട്ടീസില് സംസാരിക്കുകയിരുന്നു മന്ത്രി. പി കെ ബഷീറാണ് നോട്ടീസ് നല്കിയത്.
തെരുവു നായ്ക്കളുടെ വന്ധ്യം കരണം നിലച്ചെന്ന് പികെ ബഷീര് കുറ്റപ്പെടുത്തി. സര്ക്കാര് വിഷയം ഗൗരവമായി കാണുന്നില്ല, കുട്ടികളടക്കം സാധാരണക്കാരുടെ പ്രശ്നം കണ്ടില്ലെന്ന് നടിക്കരുത്. തെരുവുനായ പ്രശ്നത്തിലെന്താ കോടതി ഇടപെടാത്തത്? ലോകായുക്തയുടെ അല്ല പട്ടിയുടെ പല്ലാണ് സര്ക്കാര് പറിക്കേണ്ടതെന്നും അദ്ദേഹം പറഞ്ഞു.
തെരുവുനായ് കടിച്ചുള്ള മരണം ആശങ്ക ഉണ്ടാക്കുന്നുണ്ടെന്ന് മുഖ്യമന്ത്രി പറഞ്ഞു. തുടര്ന്നാണ് വാക്സീനെ കുറിച്ച് പരിശോധിക്കാന് വിദഗ്ധ സമിതിയെ നിയോഗിക്കുന്ന കാര്യം ആരോഗ്യ വകുപ്പ് പരിഗണിക്കണമെന്ന് മുഖ്യമന്ത്രി ആവശ്യപ്പെട്ടത്.
