മുല്ലപ്പെരിയാര് ഡാം തുറക്കാനുള്ള മുന്നൊരുക്കങ്ങള് പൂര്ത്തിയായെന്ന് ജലവിഭവ വകുപ്പ് മന്ത്രി റോഷി അഗസ്റ്റിന്. 20 ഓളം ക്യാമ്പുകള് തയ്യാറാക്കിയിട്ടുണ്ട്. രോഗബാധിതരെയും പ്രായമായവരെയും ആദ്യം മാറ്റും. 20 റവന്യു ഉദ്യോഗസ്ഥര്ക്ക് 20 ക്യാമ്പിന്റെ ചുമതല നല്കി. ഉദ്യോഗസ്ഥ തലത്തില് പ്രത്യേക ചുമതല നല്കി. ആളുകളെ മാറ്റി പാര്പ്പിക്കാന് നടപടികള് ആരംഭിച്ചു. ഉദ്യോഗസ്ഥരും തയ്യാറെടുപ്പുകള് പൂര്ത്തിയാക്കി. വെള്ളം ഒഴുകിപ്പോകാനുള്ള തടസങ്ങള് നീക്കി. പെരിയാര് തീരത്തുള്ളവരുടെ സുരക്ഷ ഉറപ്പു വരുത്തും. വാഹനങ്ങളും മണ്ണുമാന്തി യന്ത്രങ്ങളും സജ്ജമാണ്.
മുല്ലപ്പെരിയാര് അണക്കെട്ട് തുറക്കുമ്പോള് ആശങ്ക വേണ്ടെന്ന് വൈദ്യുതി മന്ത്രി കെ കൃഷ്ണന് കുട്ടി. ഡാം തുറന്ന് വിടുമ്പോഴുള്ള ജലം ഇടുക്കി ഡാമിന് പ്രശ്നമാകില്ലെന്ന് മന്ത്രി പറഞ്ഞു. റൂള് കര്വിനേക്കാള് ഒന്നരയടി താഴ്ത്തിയാണ് ഇടുക്കിയിലെ ജലനിരപ്പ് നിലനിര്ത്തുന്നത്. ഡാമുകള് തുറക്കുന്നത് മൂലം കെഎസ്ഇബിക്ക് 45 കോടി രൂപയുടെ നഷ്ടമുണ്ടാകുമെന്ന് വൈദ്യുതി മന്ത്രി കെ കൃഷ്ണന് കുട്ടി വ്യക്തമാക്കി.
മുല്ലപ്പെരിയാര് ഡാം തുറക്കാനുള്ള എല്ലാ മുന്നൊരുക്കങ്ങളും പൂര്ത്തിയായെന്ന് റവന്യു മന്ത്രി കെ രാജനും അറിയിച്ചു. തമിഴ്നാട് കൂടുതല് വെള്ളം കൊണ്ടു പോകുന്നുണ്ട്.കൊവിഡ് ബാധിതര്ക്കും നിരീക്ഷണത്തില് ഉള്ളവര്ക്കും പ്രത്യേക ക്യാമ്പുകള് സജ്ജമാണെന്ന് മന്ത്രി കെ രാജന് പറഞ്ഞു. കൂടാതെ സമൂഹ മാധ്യമങ്ങളിലൂടെയുള്ള അനാവശ്യ പ്രചാരണങ്ങള് ഒഴിവാക്കണമെന്നും തെറ്റായ വിവരങ്ങള് പ്രചരിപ്പിച്ചാല് കര്ശന നിയമനടപടിയെന്നും അദ്ദേഹം കൂട്ടിച്ചേര്ത്തു.
അതേസമയം മുല്ലപ്പെരിയാര് അണക്കെട്ടിലെ ജലനിരപ്പ് 138.05 അടിയായി. ഇതേതുടര്ന്ന് ജില്ലാ ഭരണകൂടം രണ്ടാമത്തെ മുന്നറിയിപ്പ്പുറപ്പെടുവിച്ചു. അണക്കെട്ടിന്റെ വൃഷ്ടി പ്രദേശത്ത് ഇന്നലെ വൈകിട്ട് ശക്തമായ മഴ പെയ്തിരുന്നു. തമിഴ്നാട് കൊണ്ടുപോകേണ്ട വെള്ളത്തിന്റെ അളവ് 2300 ഘനയടിയായി തുടരുന്നു.
ജലനിരപ്പ് താഴ്ന്നില്ലെങ്കില് മുല്ലപ്പെരിയാര് ഡാം നാളെ ഏഴ് മണിക്ക് തുറക്കുമെന്ന് തമിഴ്നാട് കേരളത്തെ അറിയിച്ചിട്ടുണ്ട്. പെരിയാറിന്റെ തീരത്ത് താമസിക്കുന്നവരെ ഇന്ന് ക്യാമ്പിലേക്ക് മാറ്റും. മുന്നൊരുക്കങ്ങള് പൂര്ത്തിയായെന്ന് ജലവിഭവ മന്ത്രി റോഷി ആഗസ്റ്റില് അറിയിച്ചു. അതേസമയം മുല്ലപ്പെരിയാര് വിഷയം സുപ്രിംകോടതി ഇന്ന് വീണ്ടും പരിഗണിക്കും. പൊതുതാത്പര്യ ഹര്ജിയില് ഉച്ചയ്ക്ക് ശേഷം വാദം കേള്ക്കും.
