തിരുവനന്തപുരം:ലോക്സഭാ തെരഞ്ഞെടുപ്പിനുള്ള സിപിഎം സ്ഥാനാര്ഥി പട്ടിക പുറത്തിറക്കി. പാര്ടി സംസ്ഥാന സെക്രട്ടറി എം വി ഗോവിന്ദനാണ് സിപിഐ എം മത്സരിക്കുന്ന 15 മണ്ഡലത്തിലെ സ്ഥാനാര്ത്ഥികളുടെ പേരുകള് പ്രഖ്യാപിച്ചത്. ബിജെപിയെ അധികാരത്തില്നിന്നും മാറ്റി നിര്ത്താനാണ് സിപിഎം ശ്രമിക്കുന്നതെന്നും അതിനുള്ള ശ്രമങ്ങള് മുന്നേറിക്കൊണ്ടിരിക്കുയാണെന്നും എം വി ഗോവിന്ദന് പറഞ്ഞു. ബിജെപി വിരുദ്ധവോട്ടുകള് ഏകോപിപ്പിക്കും. ബിജെപി മുന്നേറിയെന്ന പ്രചാര വേല കോര്പ്പറേറ്റ് മാധ്യമങ്ങള് പ്രചരിപ്പിക്കുന്നതാണ്. അത് ശരിയല്ല. കോര്പ്പറേറ്റ് മൂലധനത്തിനും ഹിന്ദുത്വ അജണ്ടയ്ക്കും ബദലായി മതനിരപേക്ഷ നിലപാടുകള് മുന്നോട്ടുകൊണ്ടുപോകാന് കഴിയണമെന്നും എം വി ഗോവിന്ദന് പറഞ്ഞു.
സിപിഐ എം പൊളിറ്റ് ബ്യൂറോ അംഗം എ വിജയരാഘവന് പാലക്കാട്ടും കേന്ദ്ര കമ്മിറ്റി അംഗങ്ങളായ ടി എം തോമസ് ഐസക് പത്തനംതിട്ടയിലും എളമരം കരീം കോഴിക്കോടും കെ കെ ശൈലജ വടകരയിലും കെ രാധാകൃഷ്ണന് ആലത്തൂരിലും മത്സരിക്കും. സംസ്ഥാന കമ്മിറ്റിഅംഗങ്ങളും ജില്ലാ സെക്രട്ടറിമാരുമായ എം വി ജയരാജന് കണ്ണൂരും വി ജോയി ആറ്റിങ്ങലിലും എം വി ബാലകൃഷ്ണന് കാസര്കോടും മത്സരിക്കും. മുന് വിദ്യാഭ്യാസമന്ത്രി സി രവീന്ദ്രനാഥ് ചാലക്കുടിയിലും സിറ്റിങ് എം പി എ എം ആരിഫ് ആലപ്പുഴയിലും എംഎല്എ കൂടിയായ നടന് എം മുകേഷ് കൊല്ലത്തും ജനവിധി തേടും. മുന് എംപി ജോയ്സ് ജോര്ജ് ഇടുക്കിയിലും ഡിവൈഎഫ്ഐ സംസ്ഥാന പ്രസിഡന്റ് വി വസീഫ് മലപ്പുറത്തും കെഎസ്ടിഎ സംസ്ഥാന നേതാവ് കെ ജെ ഷൈന് എറണാകുളത്തും മുന് മുസ്ലീംലീഗ് നേതാവ് കെ എസ് ഹംസ പൊന്നാനിയിലും മത്സരിക്കും. ഇന്ന് ചേര്ന്ന സംസ്ഥാന കമ്മിറ്റി യോഗത്തിന് ശേഷമാണ് വാര്ത്താസമ്മേളനത്തില് സ്ഥാനാര്ത്ഥികളെ പ്രഖ്യാപിച്ചത്.
എല്ഡിഎഫ് ധാരണപ്രകാരം സംസ്ഥാനത്തെ 20 സീറ്റില് 15 ഇടത്താണ് സിപിഎം മത്സരിക്കുന്നത്. നാലിടത്ത് സിപിഐയും ഒരു സീറ്റില് കേരള കോണ്ഗ്രസ് മാണിയുമാണ് മത്സരിക്കുന്നത്. 20 സീറ്റിലും സ്ഥാനാര്ഥികളെ പ്രഖ്യാപിച്ച് എല്ഡിഎഫ് ലോകസഭാ തെരഞ്ഞെടുപ്പ് രംഗത്ത് സജീവമായിട്ടും സീറ്റ് വിഭജനം പോലും യുഡിഎഫില് തീരുമാനമായിട്ടില്ല.
എല്ഡിഎഫ് സ്ഥാനാര്ഥികള്
കാസര്കോഡ് – എം വി ബാലകൃഷ്ണന് (സിപിഐ എം)
കണ്ണൂര് – എം വി ജയരാജന് (സിപിഐ എം)
വടകര – കെ കെ ശൈലജ (സിപിഐ എം)
വയനാട് – ആനി രാജ (സിപിഐ)
കോഴിക്കോട് – എളമരം കരീം (സിപിഐ എം)
മലപ്പുറം – വി വസീഫ് (സിപിഐ എം)
പൊന്നാനി – കെ എസ് ഹംസ (സിപിഐ എം)
പാലക്കാട് – എ വിജയരാഘവന് (സിപിഐ എം)
ആലത്തൂര് – കെ രാധാകൃഷ്ണന് (സിപിഐ എം)
തൃശൂര് – വി എസ് സുനില്കുമാര് (സിപിഐ)
ചാലക്കുടി – സി രവീന്ദ്രനാഥ് (സിപിഐ എം)
എറണാകുളം – കെ ജെ ഷൈന് (സിപിഐ എം)
ഇടുക്കി – ജോയ്സ് ജോര്ജ് (സിപിഐ എം)
കോട്ടയം – തോമസ് ചാഴിക്കാടന് (കേരള കോണ്?ഗ്രസ് എം)
ആലപ്പുഴ – എ എം ആരിഫ് (സിപിഐ എം)
മാവേലിക്കര – സി എ അരുണ്കുമാര് (സിപിഐ )
പത്തനംതിട്ട – ഡോ. ടി എം തോമസ് ഐസക് (സിപിഐ എം)
കൊല്ലം – എം മുകേഷ് (സിപിഐ എം)
ആറ്റിങ്ങല് – വി ജോയി (സിപിഐ എം)
തിരുവനന്തപുരം – പന്ന്യന് രവീന്ദ്രന് (സിപിഐ)
