കെപിസിസി അംഗത്വം രാജിവെച്ച് എ. മുഹമ്മദ് ബഷീർ; നാല് വർഷമായി യോഗം ചേർന്നിട്ടില്ല, പാർട്ടി ഗ്രൂപ്പ് തർക്കത്തിൽ തകർന്നു
മൂവാറ്റുപുഴ: കോണ്ഗ്രസില് വന് പൊട്ടിത്തെറി. കെപിസിസി അധ്യക്ഷ തെരഞ്ഞെടുപ്പ് വൈകുന്നതിലും ഗ്രൂപ്പ് പ്രവര്ത്തനത്തിലും പ്രതിഷേധിച്ച് മുതിര്ന്ന നേതാവും മൂവാറ്റുപുഴ സ്വദേശിയുമായ എ. മുഹമ്മദ് ബഷീര് കെപിസിസി അംഗത്വം രാജിവെച്ചു. ഇന്നലെ മൂവാറ്റുപുഴയില് വിളിച്ചുചേര്ത്ത വാര്ത്താസമ്മേളനത്തിലാണ് സ്ഫോടനാത്മക പ്രഖ്യാപനം. കൂടുതല് വെളിപ്പെടുത്തലുകള് ഉടന് ഉണ്ടാകുമെന്നും വിവാദങ്ങളുടെ പുസ്തകം ഉടന് പുറത്തിറങ്ങുമെന്നും ബഷീര് സൂചന നല്കി.
മുഖ്യമന്ത്രിക്കും ഹൈക്കമാന്ഡിനുമെതിരെ രൂക്ഷ വിമര്ശനം
മുഖ്യമന്ത്രി വി.ഡി. സതീശന്, എഐസിസി ജനറല് സെക്രട്ടറി കെ.സി. വേണുഗോപാല് എന്നിവര്ക്കെതിരെയാണ് ബഷീറിന്റെ പ്രധാന വിമര്ശനം. എഐസിസി നിര്ദേശപ്രകാരം ഗ്രൂപ്പ് അവസാനിപ്പിച്ചെന്ന് പ്രഖ്യാപിച്ചിട്ടും കേരളത്തില് ഇന്ന് വ്യക്തികളുടെ പേരില് ഗ്രൂപ്പുകള് സജീവമാണ്. പാര്ട്ടിയുടെ നിയന്ത്രണം ആരുടെ കൈകളിലാണെന്ന് വ്യക്തമല്ല. കെ.സി. വേണുഗോപാല് കേരളത്തിലെത്തി ഗ്രൂപ്പ് പ്രവര്ത്തനത്തിന് നേതൃത്വം നല്കുകയാണെന്നും ബഷീര് ആരോപിച്ചു.
നാല് വര്ഷമായി കെപിസിസി കൂടുന്നില്ല
കോണ്ഗ്രസിന്റെ പരമോന്നത ചര്ച്ചാവേദിയായ കെപിസിസി ജനറല്ബോഡി ചേര്ന്നിട്ട് നാല് വര്ഷമായി. കെ. സുധാകരന് പ്രസിഡന്റായ ശേഷം ഒരു യോഗവും വിളിച്ചിട്ടില്ല. പഞ്ചായത്ത്, പാര്ലമെന്റ്, നിയമസഭാ തെരഞ്ഞെടുപ്പ് സമയത്ത് പോലും ഒരു ചര്ച്ചയും നടത്തിയില്ല. അഭിപ്രായം പറയാന് വേദിയില്ലാത്തതുകൊണ്ടാണ് രാജിയെന്നും അദ്ദേഹം വ്യക്തമാക്കി.
വിജയം സതീശന്റെ മികവല്ല, കമ്മ്യൂണിസ്റ്റുകാരുടെ പിഴവ് കൊണ്ട്
പിണറായി വിജയന്റെ ആദ്യ സര്ക്കാരിന്റെ കാലത്ത് പ്രതിപക്ഷ നേതാവായിരുന്ന രമേശ് ചെന്നിത്തലയ്ക്ക് അന്ന് സഭയിലുണ്ടായിരുന്ന വി.ഡി. സതീശന് ഒരു പിന്തുണയും നല്കിയില്ല. രമേശ് ചെന്നിത്തല മുഖ്യമന്ത്രിയാകുമെന്ന് കരുതി മൗനം പാലിച്ചതാണ് രണ്ടാം പിണറായി സര്ക്കാരിന് വഴിയൊരുക്കിയതെന്നും ബഷീര് കുറ്റപ്പെടുത്തി. യുഡിഎഫിന് വന് ഭൂരിപക്ഷം കിട്ടിയത് വി.ഡി. സതീശന്റെ മികവുകൊണ്ടല്ലെന്നും വിജയത്തിന് നന്ദി പറയേണ്ടത് കേരളത്തിലെ യഥാര്ത്ഥ കമ്മ്യൂണിസ്റ്റ് നേതാക്കളോടാണെന്നും അദ്ദേഹം പരിഹസിച്ചു. യുഡിഎഫ് ഭരണത്തില് എത്തിയിട്ടും യുഡിഎഫ് നേതൃത്വ യോഗം പോലും കൂടാതെയാണ് ഭരണം മുന്നോട്ടുപോകുന്നതെന്നും അദ്ദേഹം പറഞ്ഞു.
കുഴല്നാടന് പ്രസിഡന്റായാല് പാര്ട്ടി തകരും
വാര്ത്തയുടെ ഏറ്റവും വലിയ ഹൈലൈറ്റ് മൂവാറ്റുപുഴ എംഎല്എക്കെതിരെയാണ്. സ്വന്തം മണ്ഡലത്തിലെ കോണ്ഗ്രസ് പ്രവര്ത്തകരെ പോലും ഒരുമിപ്പിക്കാന് കഴിയാത്ത മാത്യു കുഴല്നാടനെ കെപിസിസി പ്രസിഡന്റാക്കാന് ഗ്രൂപ്പ് ലീഡര്മാര് ശ്രമിക്കുകയാണെന്നും അങ്ങനെ സംഭവിച്ചാല് കോണ്ഗ്രസ് പാര്ട്ടി തന്നെ ഇല്ലാതാകുമെന്നും മൂവാറ്റുപുഴ സ്വദേശിയായ ബഷീര് മുന്നറിയിപ്പ് നല്കി.
