പാലക്കാട്: ബിജെപി സംസ്ഥാന നേതൃത്വവുമായി ഇടഞ്ഞുനിന്ന സന്ദീപ് വാര്യര് കോണ്ഗ്രസില്. പാലക്കാട് കോണ്ഗ്രസ് ഓഫീസില് നടന്ന ചടങ്ങില് കെപിസിസി അധ്യക്ഷന് കെ സുധാകരന് ഷാള് അണിയിച്ച് സന്ദീപ് വാര്യരെ സ്വീകരിച്ചു. പാലക്കാട് ഉപതെരഞ്ഞെടുപ്പിന് ഇനി നാലുദിവസം മാത്രം ശേഷിക്കേയാണ് ബിജെപി വിട്ട് സന്ദീപ് വാര്യര് കോണ്ഗ്രസില് ചേര്ന്നത് ബിജെപിക്ക് തിരിച്ചടിയായി.
കഴിഞ്ഞ കുറെ നാളുകളായി ബിജെപി നേതൃത്വവുമായി അകല്ച്ചയിലായിരുന്നു സന്ദീപ് വാര്യര്. പാലക്കാട് ഉപതെരഞ്ഞെടുപ്പില് എന്ഡിഎ സ്ഥാനാര്ഥി സി കൃഷ്ണകുമാറിന്റെ തെരഞ്ഞെടുപ്പ് കണ്വെന്ഷനില് വേദിയില് ഇരിപ്പിടം നല്കാതിരുന്നതിനെ തുടര്ന്ന് ഇറങ്ങിപ്പോയതോടെയാണ് സന്ദീപ് വാര്യര് ബിജെപി വിടുന്നു എന്ന തരത്തില് അഭ്യൂഹം ശക്തമായത്. തന്റെ വിഷമങ്ങള് അറിയിച്ചപ്പോള് അത് കണക്കിലെടുക്കാന് പോലും ബിജെപി സംസ്ഥാന പ്രസിഡന്റ് കെ സുരേന്ദ്രന് തയ്യാറായില്ലെന്നും സന്ദീപ് വാര്യര് തുറന്നടിച്ചു. താന് മാനസികമായി വല്ലാതെ വിഷമിച്ച ഘട്ടത്തില് പോലും പാര്ട്ടിയിലെ ഒരു നേതാവ് പോലും വിളിക്കുകയോ ആശ്വസിപ്പിക്കുകയോ ചെയ്തില്ലന്നും സന്ദീപ് പറഞ്ഞിരുന്നു.
