തിരുവനന്തപുരം: സ്പീക്കര്‍ പി.ശ്രീരാമകൃഷ്ണനെതിരേ രൂക്ഷ വിമര്‍ശനവുമായി പ്രതിപക്ഷ നേതാവ് രമേശ് ചെന്നിത്തല രംഗത്ത്. സ്പീക്കര്‍ പക്ഷപാതപരമായാണ് പെരുമാറുന്നതെന്നും പ്രതിപക്ഷത്തിന്‍റെ അവകാശങ്ങളില്‍ അദ്ദേഹം കടന്നുകയറുകയാണെന്നും പ്രതിപക്ഷ നേതാവ് കുറ്റപ്പെടുത്തി. നിയമസഭയിലെ മീഡിയ റൂമില്‍ നടത്തിയ വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.
അരിയില്‍ ഷുക്കൂര്‍ വധക്കേസില്‍ സഭയിലെ അംഗമായ ടി.വി.രാജേഷും സിപിഎം കണ്ണൂര്‍ ജില്ലാ സെക്രട്ടറി പി.ജയരാജനും പ്രതിയായ വിഷയം നിയമസഭയില്‍ അടിയന്തരപ്രമേയമായി അവതരിപ്പിക്കാന്‍ പ്രതിപക്ഷം ഇന്ന് ശ്രമിച്ചെങ്കിലും സാധിച്ചില്ല. പ്രതിപക്ഷ അംഗം സണ്ണി ജോസഫ് നല്‍കിയ നോട്ടീസ് സ്വീകരിക്കാന്‍ പോലും തയാറാകാതെ സ്പീക്കര്‍ തള്ളിയതാണ് പ്രതിപക്ഷത്തെ ചൊടിപ്പിച്ചത്. രാഷ്ട്രീയ കൊലപാതക കേസില്‍ സഭയിലെ ഒരു അംഗം പ്രതിയായ വിഷയം നിയമസഭയില്‍ അവതരിപ്പിക്കാന്‍ അവസരം ലഭിക്കുന്നില്ലെങ്കില്‍ പിന്നെന്തിനാണ് പ്രതിപക്ഷ സഭയിലേക്ക് വരുന്നതെന്ന് ചെന്നിത്തല ചോദിച്ചു. സ്പീക്കറുടെ നടപടി ഒട്ടും ശരിയായില്ല. ഗുരുതരമായ പ്രശ്നമാണിതെന്നും ഇതണോ ജനാധിപത്യമെന്നും ശക്തമായ പ്രതിഷേധമുണ്ടാകുമെന്നും അദ്ദേഹം പറഞ്ഞു.
കൊലപാതകത്തിന്‍റെ ഗൂഢാലോചനയില്‍ ഒരു എംഎല്‍എ പ്രതിയാകുന്ന സംഭവം കേരളത്തില്‍ സമീപ ഭാവിയിലുണ്ടായിട്ടില്ല. ഇക്കാര്യം നിയമസഭയില്‍ അല്ലാതെ എവിടെയാണ് ചര്‍ച്ച ചെയ്യേണ്ടതെന്നായിരുന്നു പ്രതിപക്ഷ നേതാവിന്‍റെ ചോദ്യം.
കേരളത്തില്‍ സിപിഎമ്മും ബിജെപിയും ആള്‍ക്കൂട്ടക്കൊലപാതകങ്ങള്‍ തുടരുകയാണ്. ഇതിനെതിരേ നിയമ നിര്‍മാണം നടത്തുമെന്ന കാര്യം വരുന്ന ലോക്സഭാ തെരഞ്ഞെടുപ്പിലെ കോണ്‍ഗ്രസിന്‍റെ പ്രകടന പത്രികയില്‍ ഉള്‍പ്പെടുത്താന്‍ താന്‍ ആവശ്യപ്പെട്ടിട്ടുണ്ടെന്നും രമേശ് ചെന്നിത്തല വ്യക്തമാക്കി.
