പാലക്കാട്: ബി.ജെ.പി ഭരിക്കുന്ന പാലക്കാട് നഗരസഭയില്‍ അവിശ്വാസ പ്രമേയം അവതരിപ്പിക്കാന്‍ യു.ഡി.എഫ്. 52 അംഗ കൗണ്‍സിലില്‍ LDF അംഗങ്ങളുടെ പിന്തുണ ഉണ്ടെങ്കില്‍ മാത്രമാണ് പ്രമേയം പാസാകുക. നിലവില്‍ ബിജെപിക്ക് 24, യുഡിഎഫിന് 18, എല്‍ഡിഎഫ് 9, വെല്‍ഫെയര്‍ പാര്‍ട്ടി ഒന്ന് എന്നിങ്ങനെയാണ് അംഗബലം.
മുസ്ലിം ലീഗ് വിമതനായി ജയിച്ച്, പിന്നീടു യുഡിഎഫുമായി സഹകരിച്ചിരുന്ന അംഗത്തെ പരാതിയെ തുടര്‍ന്നു കോടതി അയോഗ്യനായി പ്രഖ്യാപിച്ചു. അവിശ്വാസ പ്രമേയം കൊണ്ടുവരാനുള്ള മൂന്നിലൊന്ന് അംഗസംഖ്യയായ 18 പേരില്‍ ഒരാളുടെ കുറവുള്ളതിനാല്‍, ഇക്കാര്യത്തില്‍ വര്‍ഗീയ ഫാഷിസ്റ്റ് വിരുദ്ധ പോരാട്ടം നടത്തുന്ന സിപിഎമ്മിന്റെ നിലപാട് അറിയാന്‍ താല്‍പര്യമുണ്ടെന്ന് ഡിസിസി പ്രസിഡന്റ് വി.കെ. ശ്രീകണ്ഠനും മുസ്ലിം ലീഗ് നേതാവ് എം.എം. ഹമീദും പറഞ്ഞു.
ഘട്ടം ഘട്ടമായി അവിശ്വാസ പ്രമേയത്തിനാണു പദ്ധതി. വര്‍ക്കിങ് കമ്മിറ്റികളില്‍ നിന്ന് നാളെ യുഡിഎഫ് അംഗങ്ങള്‍ രാജിവയ്ക്കും.
തുടര്‍ന്ന് സ്റ്റാന്‍ഡിങ് കമ്മിറ്റികളില്‍ അവിശ്വാസ പ്രമേയം കൊണ്ടുവരും. ജനവിധി അട്ടിമറിക്കാനല്ല, അഴിമതിയും ക്രമക്കേടുകളും നിറഞ്ഞ നഗരസഭാ ഭരണത്തിനെതിരായ പോരാട്ടത്തിനാണു തുടക്കം കുറിച്ചിരിക്കുന്നതെന്നും നേതാക്കള്‍ അറിയിച്ചു.അതേസമയം സിപിഎം പിന്തുണച്ചാല്‍ മാത്രമെ അവിശ്വാസം പാസാകുകയുള്ളൂ.
