സംസ്ഥാനത്തെ കൊവിഡ് സാഹചര്യങ്ങള് വിലയിരുത്താന് മുഖ്യമന്ത്രിയുടെ അധ്യക്ഷതയില് ഉന്നതതല യോഗം ഇന്ന് ചേരും. രാവിലെ പത്തരക്കാണ് യോഗം. അമേരിക്കയില് ചികിത്സയിലുള്ള മുഖ്യമന്ത്രി ഓണ്ലൈനായി യോഗത്തില് പങ്കെടുക്കും. ഗുരുതരമായ കൊവിഡ് സാഹചര്യം പരിഗണിച്ച് സംസ്ഥാനത്ത് കൂടുതല് നിയന്ത്രണങ്ങള്ക്ക് സാധ്യതയുണ്ട്. സ്കൂളുകളുടെ പ്രവര്ത്തനം സംബന്ധിച്ച കാര്യങ്ങള് ആലോചിക്കാന് വിദ്യാഭ്യാസ വകുപ്പിന്റെ ഉന്നതതല യോഗവും ഓണ്ലൈനായി ചേരും.
കോവിഡ് വ്യാപനം അതിതീവ്രമായി തുടരുന്ന സാഹചര്യത്തില് നിലവിലെ നിയന്ത്രണങ്ങള് സംബന്ധിച്ച കാര്യങ്ങള് യോഗം ചര്ച്ച ചെയ്യും. സി കാറ്റഗറിയില് പെടുത്തിയിട്ടും തിരുവനന്തപുരത്ത് രോഗികളുടെ എണ്ണത്തില് കാര്യമായ കുറവില്ല. എറണാകുളത്തും വലിയ തോതില് കോവിഡ് റിപ്പോര്ട്ട് ചെയ്തതോടെ ജില്ലയില് കൂടുതല് നിയന്ത്രണം ഏര്പ്പെടുത്താന് സാധ്യതയുണ്ട്. നിലവിലെ നിയന്ത്രണങ്ങള് കൊണ്ട് മാത്രം രോഗവ്യാപനത്തെ ചെറുക്കാനികില്ലെന്ന വിലയിരുത്തലിലാണ് ആരോഗ്യ വകുപ്പ്. അതിനാല് കൂടുതല് നിയന്ത്രണം ഏര്പ്പെടുത്തണോയെന്ന കാര്യം യോഗം ചര്ച്ച ചെയ്യും.
അധ്യയനം സംബന്ധിച്ച കാര്യങ്ങള് ചര്ച്ച ചെയ്യാന് വിദ്യാഭ്യാസ വകുപ്പിന്റെ ഉന്നതതല യോഗവും ഇന്ന് ചേരും. രാവിലെ പതിനൊന്ന് മണിക്കാണ് യോഗം. കുട്ടികളിലെ വാക്സിനേഷന്, 10,11,12, ക്ലാസുകളുടെ പ്രവര്ത്തനം, പരീക്ഷാ നടത്തിപ്പ് എന്നിവ യോഗത്തില് ചര്ച്ച ചെയ്യും.
സംസ്ഥാനത്ത് ഇന്നലെ 49,771 പേര്ക്ക് കൊവിഡ് സ്ഥിരീകരിച്ചു. 34,439 പേര് രോഗമുക്തി നേടി. 1,03,553 സാമ്പിളുകള് പരിശോധിച്ചു. 48.06 ആണ് ടിപിആര്.
രോഗം സ്ഥിരീകരിച്ച് ചികിത്സയിലായിരുന്ന 34,439 പേര് രോഗമുക്തി നേടി. ഇതോടെ 3,00,556 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 54,21,307 പേര് ഇതുവരെ കൊവിഡില് നിന്നും മുക്തി നേടി.
