കോണ്‍ഗ്രസ് വിട്ട ഗുലാം നബി ആസാദ് പുതിയ പാര്‍ട്ടി പ്രഖ്യാപിച്ചു. ഡെമോക്രാറ്റിക് ആസാദ് പാര്‍ട്ടി എന്ന പേരിലാണ് സംഘടന പ്രവര്‍ത്തിക്കുക. കശ്മീര്‍ കേന്ദ്രികരിച്ചാകും ആദ്യം പാര്‍ട്ടി പ്രവര്‍ത്തിക്കുക. ജനാധിപത്യ ആശയങ്ങളുടെ പ്രചരണവും രാജ്യത്തിന്റെ വികസനവുമാണ് പുതിയ പാര്‍ട്ടിയുടെ ലക്ഷ്യം എന്ന് ഗുലാം നബി ആസാദ് വ്യക്തമാക്കി.
‘ഉര്‍ദുവിലും സംസ്‌കൃതത്തിലുമായി 1,500 ഓളം പേരുകളാണ് നിര്‍ദേശമായി ലഭിച്ചത്. തെരഞ്ഞെടുക്കുന്ന പേര് ജനാധിപത്യപരവും സമാധാനപരവും സ്വതന്ത്രവുമായിരിക്കണമെന്ന് നിര്‍ബന്ധമുണ്ടായിരുന്നു. അങ്ങനെയാണ് ഈ പേര് തെരഞ്ഞെടുത്തത്’ ഗുലാം നബി ആസാദ് പറഞ്ഞു.
പാര്‍ട്ടി പതാകയും ആസാദ് പുറത്തിറക്കി. മഞ്ഞ നിറം സര്‍ഗാത്മകതയെയും നാനാത്വത്തില്‍ ഏകത്വത്തേയും പ്രതിനിധാനം ചെയ്യുന്നു. നീല സ്വാതന്ത്ര്യത്തെയും വെള്ള സമാധാനത്തേയും പ്രതിനിധീകരിക്കുന്നു.
ഓഗസ്റ്റ് 26നാണ് ഗുലാം നബി ആസാദ് കോണ്‍ഗ്രസില്‍ നിന്ന് രാജിവയ്ക്കുന്നത്. അധ്യക്ഷന്‍ രാഹുല്‍ ഗാന്ധിയെ നിശിതമായി വിമര്‍ശിച്ചു കൊണ്ടായിരുന്നു രാജി പ്രഖ്യാപനം.
