മുതിര്ന്ന കോണ്ഗ്രസ് നേതാവ് ഗുലാം നബി ആസാദ് പദ്മ പുരസ്കാരം സ്വീകരിച്ചതില് കോണ്ഗ്രസില് കടുത്ത അതൃപ്തി. സിപിഎം പിബി അംഗവും പശ്ചിമ ബംഗാള് മുന് മുഖ്യമന്ത്രിയുമായ ബുദ്ധദേബ് ഭട്ടാചാര്യയെ പോലെ പുരസ്കാരം നിരസിക്കണമായിരുന്നുവെന്നാണ് കോണ്ഗ്രസിലെ ഒരുവിഭാഗം ഉയര്ത്തുന്ന നിലപാട്. ബിജെപി സര്ക്കാര് നല്കിയ പദ്മഭൂഷണ് പുരസ്ക്കാരം സ്വീകരിച്ചത് കശ്മീര് പുന:സംഘടനക്കെതിരായ കോണ്ഗ്രസ് പാര്ട്ടി നിലപാടിനെ ദുര്ബലപ്പെടുത്തുന്ന തീരുമാനമാണെന്ന് നേതാക്കള് പ്രതികരിക്കുന്നു.
ഗുലാംനബി ആസാദിനെ പരോക്ഷമായി വിമര്ശിച്ച് മുതിര്ന്ന കോണ്ഗ്രസ് നേതാവ് ജയറാം രമേശ് ഇന്നലെ തന്നെ രംഗത്തെത്തിയിരുന്നു. പത്മപുരസ്കാരം നിരസിച്ചതിലൂടെ ബുദ്ധദേബ് ഭട്ടാചാര്യ ചെയ്തത് ഉചിതമായ കാര്യമെന്നായിരുന്നു ജയറാം രമേശിന്റെ പ്രതികരണം. ബുദ്ധദേബ് അടിമയാവാനല്ല സ്വതന്ത്രനാവാനാണ് ആഗ്രഹിക്കുന്നതെന്നും ജയറാം രമേശ് ട്വീറ്റ് ചെയ്തു. ‘He wants to be Azad not Ghu-lam’ എന്നതായിരുന്നു ട്വീറ്റ്.
പ്രതിപക്ഷ നിരയിലെ പ്രധാനികളായ ഗുലാം നബി ആസാദിനും ബുദ്ധദേവ് ഭട്ടാചാര്യയ്ക്കും പദ്മഭൂഷന് പുരസ്ക്കാരമാണ് ലഭിച്ചത്. പുരസ്ക്കാര പ്രഖ്യാപനത്തിന് പിന്നാലെ പദ്മഭൂഷണ് നിരസിക്കുന്നു എന്ന് ബുദ്ധദേബ് ഭട്ടാചാര്യ അറിയിച്ചു. മുതിര്ന്ന സംഗീതജ്ഞ സന്ധ്യ മുഖോപാധ്യായയും പദ്മശ്രീ പുരസ്കാരം നിരസിച്ചിട്ടുണ്ട്.
