കേന്ദ്രസര്‍ക്കാര്‍ പ്രഖ്യാപിച്ച വാക്‌സിന്‍ നയം കടുത്ത ചൂഷണത്തിന് വഴിവയ്ക്കും. വാക്‌സിനേഷന്‍ സൗജന്യവും സാര്‍വ്വത്രികമാക്കുന്നതിന് പകരം വാക്‌സിന്‍ നിര്‍മ്മാതാക്കളായ മരുന്ന് കമ്പനികളുടെ കൊള്ളയ്ക്ക് ജനങ്ങളെ എറിഞ്ഞു കൊടുക്കുകയാണ് മോദി സര്‍ക്കാര്‍ ചെയ്യുന്നത്. കേന്ദ്ര നയത്തില്‍ പ്രതിഷേധിച്ച് ഏപ്രില്‍ ഇരുപത്തിനാലിന് ‘പോസ്റ്റര്‍ പ്രതിഷേധം’ സംഘടിപ്പിക്കുമെന്ന് ഡിവൈഎഫ്‌ഐ.
രാജ്യം അസാധാരണമായ പ്രതിസന്ധിയാണ് നേരിടുന്നത്. പ്രാണവായു കിട്ടാതെ മനുഷ്യര്‍ മരിച്ച് വീഴുന്നു. ആശുപത്രി വരാന്തകളിലും തെരുവുകളിലും മൃത ശരീരങ്ങള്‍ ചിതറിക്കിടക്കുന്നു. ശ്മശാനങ്ങളില്‍ മൃതശരീരങ്ങള്‍ കൂട്ടിയിട്ട് കത്തിക്കുന്ന ഭയാനകമായ കാഴ്ചയില്‍ രാജ്യം നടുങ്ങി നില്‍ക്കുന്നു. എത്രയും വേഗം വാക്‌സിനേഷന്‍ പ്രവര്‍ത്തനം പൂര്‍ത്തീ കരിക്കുക എന്നതാണ് മരണ സംഖ്യ പിടിച്ച് നിര്‍ത്തുവാനുള്ള ഏകവഴി. എന്നാല്‍, വാക്‌സിനേഷന്‍ സൗജന്യവും സാര്‍വ്വത്രികമാക്കുന്നതിന് പകരം വാക്‌സിന്‍ നിര്‍മ്മാതാക്കളായ മരുന്ന് കമ്പനികളുടെ കൊള്ളയ്ക്ക് ജനങ്ങളെ എറിഞ്ഞു കൊടുക്കുകയാണ് മോദി സര്‍ക്കാര്‍ ചെയ്യുന്നതെന്ന് ഡിവൈഎഫ്‌ഐ വിമര്‍ശിച്ചു.
കഴിഞ്ഞ ദിവസം കേന്ദ്രസര്‍ക്കാര്‍ പ്രഖ്യാപിച്ച വാക്‌സിന്‍ നയം കടുത്ത ചൂഷണത്തിന് വഴിവയ്ക്കും. ആകെ ഉല്‍പ്പാദിപ്പിക്കുന്ന വാക്‌സിന്റെ 50% കേന്ദ്രത്തിന് നല്‍കണമെന്നും ബാക്കി 50% സംസ്ഥാനങ്ങള്‍ക്കും പൊതു വിപണിയിലും വിലയ്ക്ക് വില്‍ക്കാമെന്നുമാണ് മോദി സര്‍ക്കാര്‍ പറയുന്നത്. വില എത്ര ഈടാക്കണമെന്ന് കമ്പനികള്‍ക്ക് നിശ്ചയിക്കാം. മുന്‍കൂട്ടി പരസ്യപ്പെടുത്തണമെന്ന് മാത്രം മോദി സര്‍ക്കാര്‍ പറയുന്നു. കേന്ദ്ര സര്‍ക്കാര്‍ തീരുമാനത്തിന് പിന്നാലെ സീറം ഇന്‍സ്റ്റിറ്റ്യൂട്ട് ഉല്‍പ്പാദിപ്പിക്കുന്ന കോ വിഷീല്‍ഡിന്റെ വില, ഒരു ഡോസിന് സംസ്ഥാനങ്ങള്‍ക്ക് 400 രൂപയും സ്വകാര്യ ആശുപത്രികള്‍ക്ക് 600 രൂപയുമാണെന്ന് പ്രഖ്യാപിച്ച് കഴിഞ്ഞു. കേന്ദ്ര സര്‍ക്കാരിന് നല്‍കുന്നത് 150 രൂപയ്ക്കാണെന്ന് ഓര്‍മ്മിക്കണം.
മെയ് 1 മുതല്‍ 18 വയസ്സിന് മുകളിലുള്ളവര്‍ക്ക് കൂടി വാക്‌സിന്‍ വിതരണം ആരംഭിക്കുകയാണ്. ഇതോടെ, വാക്‌സിന്റെ ചോദനം ഗണ്യമായി വര്‍ദ്ധിക്കും. ആവശ്യത്തിനുള്ള അളവില്‍ വാക്‌സിന്‍ നിര്‍മ്മാണം ഇതുവരെയും രാജ്യത്ത് വര്‍ദ്ധിപ്പിച്ചിട്ടില്ല. കൃത്രിമമായ വാക്‌സിന്‍ ക്ഷാമം സൃഷ്ടിക്കാനും ഈ മരുന്ന് കമ്പനികള്‍ മടിച്ചെന്ന് വരില്ല. വാക്‌സിന്‍ നയം പ്രഖ്യാപിച്ചതോടെ വാക്‌സിന്‍ വിതരണത്തിന്റെ ഉത്തരവാദിത്വത്തില്‍ നിന്നും കേന്ദ്രസര്‍ക്കാര്‍ തടിയൂരി കഴിഞ്ഞു.
വാക്‌സിന്‍ നിര്‍മ്മാണത്തില്‍ കേന്ദ്ര സര്‍ക്കാരിനോ പൊതുമേഖലാ സ്ഥാപനങ്ങള്‍ക്കോ ഒരു നിയന്ത്രണവും ഇല്ല. സ്വകാര്യ മരുന്ന് നിര്‍മ്മാണ കമ്പനികളുടെ സ്വതന്ത്ര വിഹാരത്തിനാണ് കേന്ദ്രസര്‍ക്കാര്‍ അവസരമൊരുക്കിയിരിക്കുന്നത്. ഈ നയം ജനവിരുദ്ധമാണ്. എല്ലാ ഇന്ത്യക്കാര്‍ക്കും സൗജന്യ വാക്‌സിന്‍ കൊടുക്കുവാനുള്ള ഉത്തരവാദിത്വം കേന്ദ്രസര്‍ക്കാര്‍ ഏറ്റെടുക്കണം. രാജ്യത്തെ ഉല്‍പ്പാദനം വര്‍ദ്ധിപ്പിച്ച് യഥേഷ്ടം വാക്‌സിന്‍ ലഭ്യമാക്കണം.
ജനങ്ങളുടെ ജീവനും പ്രാണവായുവിനും വിലയിടുന്ന കേന്ദ്രനയത്തിനെതിരെ ജനരോഷം ആളിക്കത്തണം. കോവിഡ് പ്രോട്ടോക്കോള്‍ പാലിക്കേണ്ട ഉത്തരവാദിത്വവും നമുക്കുണ്ട്. ഈ പശ്ചാത്തലത്തില്‍ നമുക്ക് ‘പോസ്റ്റര്‍ പ്രൊട്ടസ്റ്റ്’ സംഘടിപ്പിക്കാം. ഏപ്രില്‍ 24 ന് ഉഥഎക ‘പോസ്റ്റര്‍ പ്രൊട്ടസ്റ്റിന്’ ആഹ്വാനം ചെയ്യുന്നു. രാഷ്ട്രീയ ഭേദമന്യേ മുഴുവന്‍ യുവതീ യുവാക്കളും ബഹുജനങ്ങളും ഈ പ്രതിഷേധത്തിന്റെ ഭാഗമാകണമെന്ന് അഭ്യര്‍ത്ഥിക്കുന്നു.
കോവിഡ് പ്രതിരോധ പ്രവര്‍ത്തനത്തില്‍ പങ്കെടുക്കുന്നത് പോലെ തന്നെ പ്രാണവായുവും ചികിത്സയും നിഷേധിക്കുന്ന കേന്ദ്രസര്‍ക്കാരിന്റെ ജനവിരുദ്ധ നയങ്ങള്‍ക്കെതിരായ ഈ പ്രക്ഷോഭം വിജയിപ്പിക്കുന്നതിനും മുഴുവന്‍ യുവതീ യുവാക്കളും സന്നദ്ധമാകണമെന്ന് ഡിവൈഎഫഐ സംസ്ഥാന സെക്രട്ടറിയേറ്റ് അഭ്യര്‍ത്ഥിച്ചു.
