ആം ആദ്മി പാര്‍ട്ടിയുടെ കേരള ഘടകത്തെ ഒന്നാകെ പിരിച്ചുവിട്ടു. ദേശീയ നേതൃത്തിന്റേതാണ് നടപടി. ഈ മാസം പത്തിന് കേരളത്തില്‍ നിന്നുള്ള നേതാക്കളെ ദില്ലിയിലേക്ക് വിളിച്ചു വരുത്തുകയും ദേശീയ നേതാക്കളുടെ സാന്നിധ്യത്തില്‍ പ്രത്യേകയോഗം ചേരുകയും ചെയ്തു. ഇതിനു തുടര്‍ച്ചയായിട്ടാണ് ഇപ്പോള്‍ കേരളഘടകത്തെ ഒന്നാകെ പിരിച്ചു വിട്ടിരിക്കുന്നത്. അടുത്ത വര്‍ഷം നടക്കാനിരിക്കുന്ന ലോക്‌സഭാ തെരഞ്ഞെടുപ്പ് മുന്നില്‍ കണ്ടാണ് സംഘടനയില്‍ സമ്പൂര്‍ണ അഴിച്ചുപണിക്ക് ദേശീയഘടകം തീരുമാനിച്ചത് എന്നാണ് വിവരം.
സംഘടനയുടെ ഓര്‍ഗനൈസേഷ്ണല്‍ ജനറല്‍ സെക്രട്ടറി ഡോ.സന്ദീപ് പഥക്കാണ് ഇതുമായി ബന്ധപ്പെട്ട പ്രസ്താവന ഇറക്കിയിരിക്കുന്നത്. ഒഡീഷ, കേരള തെരഞ്ഞെടുപ്പുകളില്‍ മത്സരിക്കാന്‍ ആം ആദ്മി പാര്‍ട്ടി തീരുമാനിച്ചിട്ടുണ്ട്. വളരെ ഗൗരവത്തോടെ തന്നെ തെരഞ്ഞെടുപ്പിനെ നേരിടണമെന്നും അടിത്തട്ട് മുതല്‍ പ്രവര്‍ത്തനം ആരംഭിക്കാനുമാണ് ആലോചന.
പഞ്ചാബ്, ഹരിയാന, ഉള്‍പ്പെടെയുള്ള സംസ്ഥാനങ്ങളില്‍ എഎപിക്ക് മുന്നേറ്റമുണ്ടാക്കാന്‍ കഴിഞ്ഞപ്പോഴും കേരളത്തില്‍ ഇത് സാധ്യമാകാതിരുന്നതില്‍ ദേശീയ നേതൃത്ത്വത്തിന് അതൃപ്തിയുണ്ടായിരുന്നു. മറ്റ് സംസ്ഥാനങ്ങളില്‍ വിവിധ പാര്‍ട്ടികളിലെ പ്രമുഖര്‍ എഎപിയിലെത്തുമ്പോഴും കേരളത്തില്‍ നിന്നും ആരും എത്തിയില്ല. ഇത് നേതൃത്ത്വത്തിന്റെ വീഴ്ചയാണെന്നാണ് വിലയിരുത്തല്‍. ഈ സാഹചര്യത്തിലാണ് പുതിയ നേതൃത്വത്തെ കണ്ടെത്താന്‍ പാര്‍ട്ടി നേതൃത്ത്വം തീരുമാനിച്ചത്.
മാസങ്ങള്‍ക്ക് മുന്‍പ് കൊച്ചിയിലെത്തിയ അരവിന്ദ് കെജ് രിവാള്‍ കുന്നത്തുനാട്ടെ ട്വന്റി ട്വന്റിയുമായി സഹകരിക്കുമെന്ന് പ്രഖ്യാപിച്ച് ഇതിന് തുടക്കം കുറച്ചിരുന്നു. ഈ ശ്രമം ഊര്‍ജിതമാക്കാനാണ് തീരുമാനം. ജനുവരി 25 ന് ദേശീയ സെക്രട്ടറി സന്ദീപ് പഥക് തിരുവനന്തപുരത്തെത്തും. 26 ന് പുതിയ ഭാരവാഹികളെ പ്രഖ്യാപിക്കുമെന്നാമ് സൂചന.
