അടിമുടി ബലക്ഷയമുള്ള പാലാരിവട്ടം പാലം പൂര്ണ്ണമായും പൊളിച്ചു പണിയണമെന്ന സംസ്ഥാന സര്ക്കാര് നിലപാട് ശരിവച്ച ഇന്നത്തെ സുപ്രീം കോടതിയുടെ വിധി ഇടതു സര്ക്കാരിന്റെ നിലപാടുകള്ക്ക് അംഗീകാരമെന്ന് പൊതുമരാമത്ത് മന്ത്രി ജി സുധാകരന്. മെട്രോമാന് ശ്രീധരന്റെ റിപ്പോര്ട്ട്, മദ്രാസ് ഐ.ഐ.ടിയുടെ റിപ്പോര്ട്ട്, പൊതുമരാമത്ത് വകുപ്പിലെ മൂന്ന് ചീഫ് എഞ്ചിനീയര്മാരുടെ റിപ്പോര്ട്ട് എന്നീ മൂന്ന് റിപ്പോര്ട്ടുകള് തള്ളിയിട്ടാണ് ഹൈക്കോടതി പാലാരിവട്ടം പാലം വിഷയത്തില് സ്റ്റേ ചെയ്തത്. 2100 ലധികം വിള്ളലുകളാണ് പാലത്തിലുണ്ടായിരുന്നത്.
വിഷയത്തില് അറിവുള്ള ഇ. ശ്രീധരന് സാറിന്റെയും, മദ്രാസ് ഐ.ഐ.ടിയുടെയും പൊതുമരാമത്ത് വകുപ്പിലെ മൂന്ന് ചീഫ് എഞ്ചിനീയര്മാരുടേയും പാലം പൊളിച്ചുപണിയണമെന്നുള്ള റിപ്പോര്ട്ട് തള്ളികളഞ്ഞിട്ട് കൊച്ചിയിലെ ചില സ്വകാര്യ എഞ്ചിനീയര്മാരുടെയും റിട്ടയേര്ഡ് എഞ്ചിനീയര്മാരുടെയും സര്ക്കാര് വിരുദ്ധ നീക്കമാണ് ആദ്യ ഘട്ടത്തില് വിജയിച്ചത്.
9 മാസം കൊണ്ട് പഴയ പാലം പൊളിച്ച് പുതിയത് നിര്മ്മിക്കാമെന്ന് ഇ. ശ്രീധരന് സാര് അംഗീകരിക്കുകയും മന്ത്രിസഭയോഗം അദ്ദേഹത്തെ ചുമതലപ്പെടുത്തുകയും ചെയ്തിരുന്നു. 18 കോടി രൂപയും അദ്ദേഹം ആദ്യം മുടക്കാമെന്നും ഉടനെ പണം ആവശ്യമില്ലെന്നും പറഞ്ഞു. അത് നടന്നിരുന്നെങ്കില് പാലം പണി ഇപ്പോള് പൂര്ത്തിയാകുമായിരുന്നു. പാലം പണിയുടെ വിലപ്പെട്ട 8 മാസക്കാലം തടസ്സപ്പെടുത്തിയെന്ന് മാത്രമാണ് കീഴ്കോടതിയുടെ വിധികൊണ്ട് ഉണ്ടായത്. അങ്ങനെയൊരു വിധി ഒരിക്കലും ഉണ്ടാകുമെന്ന് ആരും പ്രതീക്ഷിച്ചില്ല. കാരണം അത് എഞ്ചിനീയറിംഗ് പ്രൊഫഷണലിസത്തിനെതിരായിരുന്നു. എന്തായാലും ഇന്നത്തെ സുപ്രീംകോടതി പ്രൊഫഷണലിസം അംഗീകരിച്ചു. ഭരണപരമായ തീരുമാനം അംഗീകരിച്ചു. നിയമം ഉയര്ത്തിപിടിച്ചു.
സംസ്ഥാന സര്ക്കാരിന് പാലാരിവട്ടം പാലം പണിയുമായി മുന്നോട്ട് പോകാമെന്ന പരമോന്നത കോടതിയുടെ വിധി പിണറായി സര്ക്കാരിന്റേയും പൊതുമരാമത്ത് വകുപ്പിന്റേയും നിലപാടുകള്ക്കുള്ള അംഗീകാരമാണ്. ഈ ധാര്മ്മിക വിജയം ഞങ്ങളെ കൂടുതല് ഉത്തരവാദിത്ത ബോധമുള്ളവരും വിനയാന്വിതരമാക്കുന്നു. പുതിയ കാലത്തെ പുതിയ നിര്മ്മാണവുമായി മുന്നോട്ട് പോവുക തന്നെ ചെയ്യുമെന്നും മന്ത്രി പറഞ്ഞു.
