ഹൈക്കോടതി ഉത്തരവ് മറികടന്നാണ് മുന്നാറിലെ കെ.എസ്.ഇ.ബി ഭൂമിയില് അനധികൃത നിര്മ്മാണം നടത്തിയതെന്ന് വ്യക്തമാക്കുന്ന തെളിവുകള് പുറത്ത്. സിപിഐഎം ഭരിക്കുന്ന മൂന്നാര് സഹകരണ ബാങ്കിനാണ് ഭൂമി നല്കിയിരുന്നത്. ഇവിടെ കളക്ടറുടെ എന്ഒസി വാങ്ങാതെ നിര്മാണം നടത്തി. എന്ഒസി വേണമെന്ന ഹൈക്കോടതി ഉത്തരവും ലംഘിച്ചു. തുടര്ന്ന് പരാതികള് ഉയര്ന്നതോടെ നിര്മാണ പ്രവര്ത്തനങ്ങള് ഹൈക്കോടതി തടയുകയായിരുന്നു.
നിര്മാണ പ്രവര്ത്തനങ്ങള് നടന്നത് അതീവ സുരക്ഷ മേഖലയില് ആണെന്നും കണ്ടെത്തിയിട്ടുണ്ട്. അതേസമയം എന് ഒ സിക്ക് അപേക്ഷ നല്കിയിരുന്നുവെന്ന് ബാങ്ക് പ്രസിഡന്റ് കെവി ശശി പറഞ്ഞു. നിബന്ധനകള് പാലിച്ചാണ് ഭൂമി ലഭിച്ചതെന്നും കെവി ശശി പറഞ്ഞു. കഴിഞ്ഞ പിണറായി സര്ക്കാരിന്റെ കാലത്ത് സിപിഎം നിയന്ത്രണത്തിലുള്ള സൊസൈറ്റിക്ക് മൂന്നാറില് ഹൈഡല് ടൂറിസം പദ്ധതിക്ക് ഭൂമി നല്കിയത് ബോര്ഡ് അറിയാതെ ആണെന്നായിരുന്നു കെഎസ്ഇബി ചെയര്മാന് ഡോ.ബി. അശോകിന്റെ ആരോപണം. ഇതേത്തുടര്ന്ന് രേഖകള് വീണ്ടും പരിശോധിക്കുമെന്ന് വൈദ്യുതി മന്ത്രി കെ കൃഷ്ണന് കുട്ടി വ്യക്തമാക്കിയിരുന്നു.
അതേസമയം കെഎസ്ഇബി ചെയര്മാന്റെ വിമര്ശനത്തില് മറുപടിയുമായി മുന് വൈദ്യുത വകുപ്പ് മന്ത്രി എംഎം മണിയും രംഗത്തെത്തി. തന്റെ ഭരണ കാലത്ത് എല്ലാം നിയമപരമായാണ് ചെയ്തതെന്ന് അദ്ദേഹം വ്യക്തമാക്കി. കൂടുതല് കാര്യങ്ങള് മുഖ്യമന്ത്രി ഉള്പ്പെടെയുള്ളവരുമായി ആലോചിച്ച് പറയാം. വൈദ്യുതി മന്ത്രി അറിഞ്ഞിട്ടാണോ ചെയര്മാന് ഇക്കാര്യങ്ങള് പറഞ്ഞതെന്നും അദ്ദേഹം ചോദിച്ചിരുന്നു.
കഴിഞ്ഞ സര്ക്കാരിന്റെ കാലത്ത് ബോര്ഡില് പൊലീസ് സംരക്ഷണം വേണ്ടി വന്നില്ലെന്നും ഇപ്പോള് വൈദ്യുതി ഭവനില് പൊലീസിനെ കയറ്റേണ്ട നിലയില് കാര്യങ്ങള് എത്തിയെന്നും അദ്ദേഹം വിമര്ശനം ഉന്നയിച്ചിരുന്നു.
