എംഎസ്എഫ് വനിതാ വിഭാഗമായ ഹരിത വനിതാ കമ്മീഷന് നല്‍കിയ പരാതി വിവാദമായിരിക്കെ മുസ്ലിം ലീഗിനെ വെട്ടിലാക്കി ശബ്ദ സന്ദേശം പുറത്ത്. എംഎസ്എഫ് മലപ്പുറം ജില്ലാ സെക്രട്ടറി വി അബ്ദുള്‍ വഹാബിന്റെ ശബ്ദ രേഖയാണ് പുറത്തു വന്നിരിക്കുന്നത്. ഹരിത നേതൃത്വത്തെ ഒതുക്കണമെന്ന് ലീഗ് നേതൃത്വം എംഎസ്എഫിന് കൃത്യമായ നിര്‍ദ്ദേശം നല്‍കിയതായി അബ്ദുള്‍ വഹാബ് ശബ്ദരേഖയില്‍ പറയുന്നു.
ഹരതിയുടെ സംസ്ഥാന കമ്മിറ്റി അംഗവുമായി സംസാരിക്കുന്ന ഫോണ്‍ സംഭാഷണമാണ് പുറത്തു വന്നിരിക്കുന്നത്. എംഎസ്എഫ് ദേശീയ വൈസ് പ്രസിഡന്റ് ഫാത്തിമ തെഹ്ലിയക്കെതിരെയാണ് പ്രധാനമായും ശബ്ദ രേഖയില്‍ പറയുന്നത്.
കഴിഞ്ഞ നിയമസഭാ തെരഞ്ഞെടുപ്പില്‍ മുസ്ലിം ലീഗ് സ്ഥാനാര്‍ത്ഥിയാവുമെന്ന തരത്തില്‍ ഫാത്തിമ തെഹ്ലിയയുടെ പേര് സജീവമായി ചര്‍ച്ച ചെയ്തിരുന്നു. എന്നാല്‍ അന്ന് ഫാത്തിമ നടത്തിയ പല ഇടപെടലുകളും ലീഗിന് വിഷമമുണ്ടാക്കിയെന്ന് ശബ്ദരേഖയില്‍ പറയുന്നു.
ഇവരെ മൊത്തത്തിലൊന്ന് കടിഞ്ഞാണിടണമെന്നും ലീഗിനേക്കാളും മേലെ ലീഗിന്റെ അഭിപ്രായവുമായി വരരുതെന്ന കൃത്യമായ നിര്‍ദ്ദേശം ലീഗ് എംഎസ്എഫിന് തന്നിട്ടുണ്ട് എന്നും ശബ്ദരേഖയില്‍ പറയുന്നു. ഹരിത വനിതാ കമ്മീഷന് നല്‍കിയ പരാതി അച്ചടക്ക ലംഘനമാണെന്നാണ് ഇന്നലെ പിഎംഎ സലാം പറഞ്ഞത്.
ഇതിനിടെ ഹരിതയുടെ സംസ്ഥാന, ജില്ലാതല പ്രവര്‍ത്തനം നിര്‍ത്താനും ലീഗിന് ആവശ്യമുയരുന്നുണ്ടെന്ന സൂചനയുണ്ട്. പെണ്‍കുട്ടികള്‍ക്ക് മാത്രമായ ഹരിത എന്നൊരു വിഭാഗം എംഎസ്എഫില്‍ വേണ്ടെന്ന അഭിപ്രായമാണ് ലീഗില്‍ ഒരുവിഭാഗത്തിന്. ആണ്‍, പെണ്‍ വ്യത്യാസമില്ലാതെ എംഎസ്എഫ് മതിയെന്നാണ് വികാരം. മറ്റ് യുവജന സംഘടനകളായ എസ്എഫ്ഐ, കെഎസ്യു, എഐഎസ്എഫ്, എബിവിപി തുടങ്ങിയവയിലൊന്നും പെണ്‍കുട്ടികള്‍ക്ക് മാത്രമായി പ്രത്യേക ഘടകമില്ല എന്നതും ഇവര്‍ ഉയര്‍ത്തിക്കാട്ടുന്നു.
അതേസമയം ക്യാമ്പസുകളിലെ ഹരിതയുടെ പ്രവര്‍ത്തനം എംഎസ്എഫിന് ഉപകാരപ്രദമായിട്ടുണ്ടെന്ന് നേതൃത്വം സമ്മതിക്കുന്നു. ഈ സാഹചര്യത്തില്‍ ക്യാമ്പസുകളില്‍ മാത്രം പെണ്‍കുട്ടികളുടെ ഗ്രൂപ്പായി ഹരിത പ്രവര്‍ത്തിക്കട്ടെ എന്നാണ് ഒരു വിഭാഗം ഉയര്‍ത്തുന്ന ആവശ്യം.
