സംസ്ഥാനത്തെ ഷോപ്പിംഗ് മാളുകളില് നിയന്ത്രണം. മാളുകളില് 25 സ്ക്വയര് ഫീറ്റിന് ഒരാളെന്ന നിലയില് ആളുകളെ നിയന്ത്രിക്കാന് നിര്ദേശം നല്കി. കേരളത്തില് കൊവിഡ് വ്യാപനം രൂക്ഷമായ സാഹചര്യത്തിലാണ് പുതിയ തീരുമാനം. തിരുവനന്തപുരം, എറണാകുളം ജില്ലകളിലാണ് കൊവിഡ് വ്യാപനം ഏറ്റവും അധികമുള്ളത്.
കൊവിഡ് വ്യാപന പശ്ചാത്തലത്തില് നിയന്ത്രണങ്ങള് കടുപ്പിക്കുന്നതിന്റെ ഭാഗമായി സംസ്ഥാനത്തെ സ്കൂളുകളും ഭാഗികമായി അടക്കും. ഒന്പതാം തരം വരെയുള്ള ക്ലാസുകളാണ് അടയ്ക്കുക. ഈ മാസം 21 മുതല് സ്കൂള് അടയ്ക്കും. എന്നാല് പത്ത്, പതിനൊന്ന്, പന്ത്രണ്ട് ക്ലാസുകളില് ഓഫ്ലൈനായി പഠനം തുടരും.
സര്ക്കാര് ഓഫിസുകളില് ജോലി ചെയ്യുന്ന ഗര്ഭിണികള്ക്ക് വര്ക്ക് ഫ്രം ഹോം സംവിധാനം അനുവദിക്കാനും തീരുമാനമായിട്ടുണ്ട്. സര്ക്കാര്, അര്ദ്ധ സര്ക്കാര്, പൊതുമേഖലാ സ്ഥാപനങ്ങള്, സഹകരണ സ്ഥാപനങ്ങള് എന്നിവിടങ്ങളിലേതുള്പ്പെടെ എല്ലാ ഔദ്യോഗിക പരിപാടികളും ചടങ്ങുകളും ഓണ്ലൈന് ആയി നടത്തേണ്ടതാണെന്നും കൊവിഡ് അവലോകന യോഗത്തില് തീരുമാനമായി.
ടെസ്റ്റ് പോസിറ്റിവിറ്റി നിരക്ക് 20 ല് കൂടുതലുള്ള ജില്ലകളില് സാമൂഹ്യ, സാംസ്കാരിക, സാമുദായിക പരിപാടികള്ക്കും വിവാഹം, മരണാനന്തര ചടങ്ങുകള് എന്നിവയുടേത് പോലെ 50 പേരായി പരിമിതപ്പെടുത്തും. കൂടുതല് പേര് പങ്കെടുക്കേണ്ട നിര്ബന്ധിത സാഹചര്യങ്ങളില് പ്രത്യേക അനുവാദം വാങ്ങണം. ടെസ്റ്റ് പോസിറ്റിവിറ്റി നിരക്ക് 30 ല് കൂടുതല് വന്നാല് പൊതുപരിപാടികള് നടത്താന് അനുവദിക്കില്ല.
എല്ലാ വ്യാപാര സ്ഥാപനങ്ങളും ഓണ്ലൈന് ബുക്കിങ്ങും വില്പ്പനയും പ്രോത്സാഹിപ്പിക്കേണ്ടതാണ്. മാളുകളില് ജനത്തിരക്ക് ഉണ്ടാകാത്ത രീതിയില് 25 സ്ക്വയര് ഫീറ്റിന് ഒരാളെന്ന നിലയില് നിശ്ചയിക്കേണ്ടതും അതനുസരിച്ചു മാത്രം ആളുകളെ പ്രവേശിപ്പിക്കേണ്ടതുമാണ്. ഇത് ജില്ലാ ഭരണകൂടം ഉറപ്പു വരുത്തണമെന്നും യോഗത്തില് തീരുമാനമായി.
