ബിവറേജസ് ഔട്ട്ലെറ്റുകളിലും ബാറുകളിലും ജനപ്രിയ ബ്രാന്ഡുകള് കിട്ടാനില്ല. വെയര്ഹൗസുകളില് മദ്യശേഖരം കുറഞ്ഞു. ഇതോടെ വിദേശമദ്യത്തിന്റെ വില്പ്പനയ്ക്ക് സാധ്യതയുണ്ടെന്ന് എക്സൈസ് ഇന്റലിജന്സ് മുന്നറിയിപ്പ് നല്കി.
ജനപ്രിയ മദ്യങ്ങളുടെ ലഭ്യതക്കുറവ് സര്ക്കാരിന്റെ ശ്രദ്ധയില്പ്പെട്ടിട്ടുണ്ടെന്ന് മന്ത്രി എം ബി രാജേഷ് പറഞ്ഞു. ഡിസ്റ്റിലറികളില് നിര്മ്മാണം കുറഞ്ഞതാണ് കാരണം. പ്രശ്നം സര്ക്കാരിന്റെ പരിഗണനയിലുണ്ടെന്നും വേഗത്തില് പരിഹാരം കാണുമെന്നും മന്ത്രി പറഞ്ഞു.
20,000 കെയ്സ് മദ്യമാണ് ദിനംപ്രതി കേരളത്തില് വില്ക്കപ്പെടുന്നത്. രണ്ടുലക്ഷം കെയ്സ് മദ്യം മാത്രമാണ് നിലവില് വെയര്ഹൗസുകളില് സ്റ്റോക്ക് ഉള്ളത്. വില്പ്പന കുറഞ്ഞതോടെ ബിവറേജസ് ഷോപ്പുകളില് നിന്നുള്ള പ്രതിദിന വരുമാനം 17 കോടി രൂപയ്ക്ക് താഴെയായി. മുമ്പ് 25 കോടി രൂപയ്ക്ക് മുകളില് ആയിരുന്നു.
750 രൂപവരെ വില വരുന്ന മദ്യമാണ് കിട്ടാത്തത്. വിലകൂടിയ ബ്രാന്ഡുകളുടെ സ്റ്റോക്ക് ഉണ്ടെങ്കിലും ജനപ്രിയ ബ്രാന്ഡുകളായ എംസിബി, ഹണീബി, ഓപിആര്, ഓസിആര്, ഓള്ഡ് മങ്ക് എന്നീ ബ്രാന്ഡുകളാണ് ലഭിക്കാന് ബുദ്ധിമുട്ടുന്നതെന്ന് ഉപഭോക്താക്കള് പറയുന്നു.
