ബംഗളൂരു: ലോകത്തിലെ ഏറ്റവും നീളംകൂടിയ റെയില്വേ പ്ലാറ്റ്ഫോം കര്ണാടകയിലെ ഹുബ്ബള്ളിയിലെ ശ്രീസിദ്ധരൂധ സ്വാമിജി സ്റ്റേഷനില് തുറന്നു. പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തു.
1507 മീറ്റര് നീളവും 10 മീറ്റര് വീതിയുമുള്ള പ്ലാറ്റ്ഫോം 20 കോടി രൂപ ചെലവിലാണ് നിര്മിച്ചത്. ഗിന്നസ് ബുക്ക് ഓഫ് വേള്ഡ് റെക്കോഡ്സ് അധികൃതര് പ്ലാറ്റ്ഫോമിനെ അംഗീകരിച്ചതായി റെയില്വേ അറിയിച്ചു. സ്റ്റേഷന്റെ 550 മീറ്റര് നീളമുള്ള ഒന്നാം നമ്പര് പ്ലാറ്റ്ഫോം നീളം കൂട്ടിയതോടെയാണ് റെക്കോഡ് സ്വന്തമാക്കിയത്.
ഹൊസപേട്ട് സ്റ്റേഷന്റെ ഹൊസപേട്ട്-ഹുബ്ബള്ളി-ടിനെയ്ഘട്ട് സെക്ഷന് പാതയുടെ വൈദ്യുതീകരണം, സ്റ്റേഷന്റെ നവീകരണം എന്നിവയുടെ ഉദ്ഘാടനവും ഹുബ്ബള്ളി-ധാര്വാഡ് സ്മാര്ട്ട് സിറ്റി പദ്ധതികളുടെ തറക്കല്ലിടലും മോദി നിര്വഹിച്ചു.