തൃശൂര്‍: തൃശൂര്‍ പൂര നഗരിയില്‍ ആന ഇടഞ്ഞു. ശ്രീമൂല സ്ഥാനത്തിന് സമീപം ഗണപതി അമ്പലത്തിന് അടുത്ത് വെച്ചാണ് ആന ഇടഞ്ഞത്. പൂരത്തില്‍ ആദ്യം എത്തുന്ന കണിമംഗലം ശാസ്താവിന്റെ കൂട്ടാനയാണ് ഇടഞ്ഞത്. മച്ചാട് ധര്‍മ്മന്‍ എന്ന ആനയാണ് ഇടഞ്ഞത്. ശ്രീമൂല സ്ഥാനവും കടന്ന് ആന മുന്നോട്ട് ഓടിയത് സ്ഥലത്ത് പരിഭ്രാന്തി സൃഷ്ടിച്ചു. ഇടഞ്ഞ ആനയെ ആളുകള്‍ കൂട്ടത്തോടെ പിന്തുര്‍ന്നത് ആനയ്ക്ക് അങ്കലാപ്പുണ്ടാക്കിയെന്നാണ് സംഘാടകര്‍ പറയുന്നത്. കുറച്ചു സമയത്തിനുള്ളില്‍ തന്നെ കൂച്ചുവിലങ്ങിട്ട് ആനയെ മെരുക്കി.
ജനങ്ങള്‍ വന്‍തോതില്‍ എത്തി തുടങ്ങാത്തതിനാല്‍ അപകടമൊഴിവാക്കിക്കൊണ്ട് ആനയെ തളക്കാനായി. സ്ഥലത്തുണ്ടായിരുന്ന എലിഫന്റ് സ്‌ക്വാഡാണ് ആനയെ തളച്ചത്. എട്ട് ആനകളുടെ അകമ്പടിയോടെയായിരുന്നു കണിമംഗലം ശാസ്താവ് എഴുന്നള്ളിയത്.
ഇടഞ്ഞ മച്ചാട് ധര്‍മനെ ഇനി എഴുന്നള്ളിക്കില്ല എന്നാണ് റിപ്പോര്‍ട്ട്. അല്‍പനേരം മാത്രം നീണ്ട് നിന്ന ആശങ്കകള്‍ക്കൊടുവില്‍ പൂരം അതിന്റെ ഭംഗിയോടെ തുടരുകയാണ്.
ഇന്ന് പകല്‍ 12.20ന് വടക്കുന്നാഥ ക്ഷേത്രത്തിന്റെ തെക്കേഗോപുര വാതില്‍ തുറന്നതോടെ പൂരത്തിന് തുടക്കമാവുകയാണ്. രാവിലെ എട്ട് ദേശപ്പൂരങ്ങളോടെ എഴുന്നള്ളത്തോടെ മഹാപൂരം അരങ്ങേറും. കണിമംഗലം ദേശത്തിന്റെ എഴുന്നള്ളിപ്പ് ആദ്യമെത്തി തെക്കേ ഗോപുരം നട വഴി വടക്കുനാഥ ക്ഷേത്രത്തിനുള്ളില്‍ പ്രവേശിക്കും. തുടര്‍ന്ന് പനമുക്കുംപിള്ളി, ചെമ്പൂക്കാവ്, പൂക്കാട്ടിക്കര കാരമുക്ക്, ലാലൂര്‍, ചൂരക്കോട്ടുകാവ്, അയ്യന്തോള്‍, കുറ്റൂര്‍ നെയ്തലക്കാവ് എന്നീ ദേശങ്ങളുടെ ചെറുപൂരങ്ങളും എത്തും.
