വ്യാഴാഴ്ച മുതല്‍ തദ്ദേശ തിരഞ്ഞെടുപ്പിന് നാമനിര്‍ദേശ പത്രിക സമര്‍പ്പിക്കാം. തദ്ദേശ തിരഞ്ഞെടുപ്പിനുള്ള എല്ലാ പ്രവര്‍ത്തനങ്ങള്‍ക്കും കര്‍ശനമായ കോവിഡ് സുരക്ഷാ മാനദണ്ഡങ്ങളാണ് തിരഞ്ഞെടുപ്പ് കമ്മിഷന് ഏര്‍പ്പെടുത്തിയിരിക്കുന്നത്. സ്ഥാനാര്‍ഥി ഉള്‍പ്പെടെ മൂന്ന് പേര്‍ക്ക് മാത്രമാവും പ്രവേശനം അനുവദിക്കുക.
നാമനിര്‍ദേശ പത്രിക സ്വീകരിക്കാനായി വരണാധികാരികള്‍ വലിപ്പവും വായു സഞ്ചാരവുമുള്ള മുറികള്‍ ഏര്‍പ്പെടുത്തും. നാമനിര്‍ദേശ പത്രികാ സമര്‍പ്പണത്തിന് സ്ഥാനാര്‍ഥി, നിര്‍ദശിക്കുന്നയാള്‍ ഉള്‍പ്പെടെ മൂന്ന് പേര്‍ക്ക് മാത്രമെ പ്രവേശന അനുമതിയുള്ളൂ. കൈകഴുകി, സാനിറ്റെസര്‍ ഉപയോഗിച്ചശേഷമെ ഹാളില്‍പ്രവേശിക്കാവൂ.
മാസ്‌ക്ക് നിര്‍ബന്ധമാണ്. സാമൂഹിക അകലം പാലിച്ചുകൊണ്ടുമാത്രമെ പത്രിക ഉദ്യോഗസ്ഥര്‍ക്ക് കൈമാറാവൂ. ആവശ്യമെങ്കില്‍ സ്ഥാനാര്‍ഥികള്‍ക്ക് നാമനിര്‍ദേശ പത്രിക സമര്‍പ്പണത്തിന് നേരത്തെ നിശ്ചിതമായ സമയം ബുക്ക് ചെയ്യാം. തിരക്ക് ഒഴിവാക്കാനാണിത്. ഉദ്യോഗസ്ഥര്‍ക്ക് ഇതുസംബന്ധിച്ച് കമ്മിഷന് നിര്‍ദേശം നല്‍കിയിട്ടുണ്ട്. ഒന്നിലധികം പേര്‍ എത്തിയാല്‍, അവര്‍ക്ക് കാത്തിരിക്കാന്‍ പ്രത്യേക സൗകര്യം ഒരുക്കും.
മാസ്‌ക്ക്, കൈയ്യുറ, മുഖത്ത് ഷീല്‍ഡ് എന്നിവ ഉപയോഗിച്ചു കൊണ്ടുമാത്രമെ ഉദ്യോഗസ്ഥര്‍ പത്രിക സ്വീകരിക്കാവൂ. പത്രിക കൈമാറിയശേഷവും സാനിറ്റെസര്‍ ഉപയോഗിക്കണം. നാമനിര്‍ദേശ പത്രികാ സമര്‍പ്പണത്തിന് സ്ഥാനാര്‍ഥി വരുന്ന വാഹനം മാത്രമെ പാടുള്ളൂ. ജാഥ, ആള്‍ക്കൂട്ടം, വാഹനവ്യൂഹം ഇവ പാടില്ല. കണ്‍ടെയ്‌മെന്റ് സോണില്‍ നിന്നുള്ളവര്‍, ക്വാറന്റീനില്‍ ഉള്ളവര്‍ പ്രത്യേകമായി സമയം ചോദിച്ചശേഷമെ നാമനിര്‍ദേശ പത്രിക നല്‍കാനെത്താവൂ. ഇവരുടെ പത്രിക സ്വീകരിക്കാന്‍ പ്രത്യേക ക്രമീകരണം വേണം. കോവിഡ് പോസിറ്റീവായ സ്ഥാനാര്‍ഥിയാണെങ്കില്‍ നിര്‍ദേശകന്‍ വഴി പത്രിക നല്‍കാം. കമ്മിഷന് ചുമതലപ്പെടുത്തുന്ന ഉദ്യോഗസ്ഥന് മുന്‍പാകെ സ്ഥാനര്‍ഥിക്ക് സത്യപ്രതിജ്ഞചെയ്ത് ഒപ്പ് രേഖപ്പെടുത്തി വരണാധികാരിക്ക് എത്തിക്കാം.
