സംസ്ഥാനത്ത് അതിതീവ്ര മഴ തുടരുമെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഇന്ന് പത്ത് ജില്ലകളില് റെഡ് അലേര്ട്ടും നാല് ജില്ലകളില് ഓറഞ്ച് അലേര്ട്ടുമാണ്. മഴയുടെ പശ്ചാത്തലത്തില് 12 ജില്ലകളില് വിദ്യാഭ്യാസ സ്ഥാപനങ്ങള്ക്ക് അവധി പ്രഖ്യാപിച്ചു, 95 ദുരിതാശ്വാസ ക്യാംപുകളിലായി 2,291 പേരെ മാറ്റിപ്പാര്പ്പിച്ചു.
മധ്യ വടക്കന് ജില്ലകളിലാണ് ഇന്ന് അതിതീവ്ര മഴ ലഭിക്കുക. ആലപ്പുഴ മുതല് കണ്ണൂര് വരെയുള്ള പത്ത് ജില്ലകളില് റെഡ് അലേര്ട്ടും ബാക്കിയുള്ള നാല് ജില്ലകളില് ഓറഞ്ച് അലേര്ട്ടുമാണ്. നാളെയും 9 ജില്ലകളില് അതിതീവ്ര മഴ മുന്നറിയിപ്പുണ്ട്. മിന്നല് പ്രളയത്തിനും ഉരുള് പൊട്ടലിനും മണ്ണിടിച്ചിലിനും സാധ്യതയുള്ളതിനാല് അപകട സാധ്യതാ മേഖലയിലുള്ളവര്ക്ക് പ്രത്യേക ജാഗ്രത നിര്ദേശം നല്കി. കടലില് പോകുന്നതിന് മത്സ്യതൊഴിലാളികള്ക്ക് കര്ശന വിലക്കുണ്ട്.
കോഴിക്കോട്, വയനാട് ജില്ലകളിലും മലപ്പുറം നിലമ്പൂരിലും വിനോദ സഞ്ചാര കേന്ദ്രങ്ങളിലേക്ക് സഞ്ചാരികള്ക്ക് പ്രവേശനമുണ്ടാകില്ല. മലപ്പുറത്ത് നാടുകാണി ചുരം വഴി മൂന്ന് ദിവസം ഗതാഗത നിയന്ത്രണവും ഏര്പ്പെടുത്തിയിട്ടുണ്ട്. മഴക്കെടുതികള് നേരിടാന് സംസ്ഥാനത്ത് 9 എന്ഡിആര്എഫ് സംഘങ്ങളില് വിവിധ ജില്ലകളില് തുടരുന്നുണ്ട്.
