കോവിഡ് മരണങ്ങളില് നഷ്ടപരിഹാരത്തിനായി കേന്ദ്രസര്ക്കാര് 7274. 4 കോടി അനുവദിച്ചു. സംസ്ഥാനങ്ങളുടെ ദുരന്ത നിവാരണ ഫണ്ടിലേക്കാണ് തുക നല്കിയത്. കോവിഡ് ബാധിച്ച് മരിച്ചവരുടെ ബന്ധുക്കള്ക്ക് നഷ്ടപരിഹാരം നല്കുന്നതിനായാണ് തുക അനുവദിച്ചത്. 23 സംസ്ഥാനങ്ങളുടെ ദുരന്ത നിവാരണ ഫണ്ടിലേക്കാണ് ഇപ്പോള് തുക അനുവദിച്ചിരിക്കുന്നത്.
നേരത്തെ അഞ്ച് സംസ്ഥാനങ്ങള്ക്ക് 1,550.20 കോടി രൂപ കേന്ദ്ര സര്ക്കാര് അനുവദിച്ചിരുന്നു. കൊവിഡ് ബാധിച്ച് മരിച്ചവരുടെ ബന്ധുക്കള്ക്ക് 50,000 രൂപ നഷ്ടപരിഹാരം നല്കണമെന്ന് കേന്ദ്ര സര്ക്കാര് സുപ്രിംകോടതിയില് നിര്ദേശിച്ചിരുന്നു. ദുരന്ത നിവാരണ ഫണ്ടില് നിന്ന് സംസ്ഥാനങ്ങള് വേണം ഇത് നല്കേണ്ടതെന്നും കേന്ദ്രം സത്യവാങ്മൂലത്തില് പറഞ്ഞിരുന്നു. നഷ്ടപരിഹാര വിതരണത്തിന് സുപ്രിംകോടതി നിര്ദേശപ്രകാരം ദേശീയ ദുരന്ത നിവാരണ അതോറിറ്റി തയാറാക്കിയ മാര്ഗരേഖയും സമര്പ്പിച്ചിരുന്നു.
അതേസമയം നഷ്ടപരിഹാരം നിശ്ചയിക്കാന് സംസ്ഥാന സര്ക്കാര് മാര്ഗരേഖ പുറത്തിറക്കിയിരുന്നു. കേന്ദ്ര സര്ക്കാര് മാനദണ്ഡപ്രകാരം കൊവിഡ് മരണം തീരുമാനിക്കും. മരിച്ചവരുടെ ബന്ധുക്കള് ജില്ലാ കളക്ടര്ക്ക് നിര്ദേശം നല്കണമെന്നും അപേക്ഷ സമര്പ്പിച്ച് 30 ദിവസത്തിനകം തീരുമാനമുണ്ടാകുമെന്നും സര്ക്കാര് പുറത്തിറക്കിയ മാര്ഗ രേഖയില് പറയുന്നു.
സുപ്രിം കോടതിയുടെ ഉത്തരവ് പ്രകാരം അടുത്ത ബന്ധുക്കള്ക്കാണ് നഷ്ടപരിഹാരം ലഭിക്കുക. കൊവിഡ് മരണത്തില് ആശയ കുഴപ്പമില്ലെന്നും കേന്ദത്തിന്റെ നിര്ദേശം അനുസരിച്ച് പട്ടികയില് മാറ്റം വരുമെന്നും മുഖ്യമന്ത്രി പിണറായി വിജയന് പറഞ്ഞിരുന്നു. പരാതികള് വന്നാല് പരിശോധിക്കുമെന്നും അദ്ദേഹം വ്യക്തമാക്കിയിരുന്നു.
